តន វិបុល - ភាសាអក្សរសាស្ត្រ

ថ្ងៃនេះ កូនអត់ទ្រាំបាន... អ្នកដទៃអត់ទ្រាំមិនបាន។ បើកូនអត់ទ្រាំបានចំពោះរឿងដែលអ្នកដទៃអត់ទ្រាំមិនបាននៅថ្ងៃនេះ។ នៅថ្ងៃស្អែកកូនប្រាកដជាសម្រេចកិច្ចការដែលអ្នកដទៃសម្រេចមិនបាន កូននឹងមានឈ្មោះថា ជោគជ័យ...

មារយាទឆ្កែ

ដូចសមុទ្រមិនប្ដូរជាតិប្រៃ. ដូចឆ្កែចង្រៃគៃមារយាទ
ដ្បិតកើតមកបានត្រឹមមួយជាតិ. ចរិតចោលម្អៀតមិនឃ្លាតឆ្ងាយ។

កន្ទុយបក់ ស្លឹកត្រចៀកបាក់ខ្លប់. ឡេមឡឺមអែបអបតែចៅហ្វាយ
ចួនទៅចច្រប់តែឆ្នាំងបាយ. រុះរើសកកាយពេញតែផ្ទះ។

បើមានតែឆ្កែបែបនេះច្រើន. ឥតមានចម្រើនដល់ឆ្នាំងខ្ទះ
ចួនគេហៅម្ចាស់ទៅជម្រះ. ដុសលាងពន្លះព្រោះតែឆ្កែ។

ឈ្លើងក្នុងយល់សប្ដ

ចិត្តរន្ធត់ទ្រមទ្រុឌដំណេក. សុបិនឃើញមេឃខ្មៅឯជើង

ធ្លាក់ភ្លៀងលង់លិចតែស្រុកយើង. ទឹកជន់នាំឈ្លើងមកវាយលុក។

ទាំងតូចទាំងធំផ្ដុំរវាម. បឺតជញ្ជក់ឈាមទាមសព្វមុខ

គោក្របី វាឆីមិនទុក. ពោះប៉ោងទ្រលុកដូចដំរី។

វាជញ្ជក់ឈាមដូចបីសាច. ជនណាមិនខ្លាចមិនភិតភ័យ

បើវាបឺតឈាមគ្មានប្រណី. ខ្សោះឈាមប្រុសស្រីស្លាប់មិនខាន។

ក្នុងចិត្តភិតភ័យខ្លាំងពន់ពេក. ស្ទុះពីដំណេកញាប់ញ័រប្រាណ

មិនគួរខ្លបខ្លាចសត្វតិរច្ឆាន. រឿងរ៉ាវហួសស្មានឆ្អែតដំណេក។

ក្មេងស្ទាវ

ក្រុមស្ទាវវ័យក្មេង. បានត្រឹមតែលេង. វង្វេងចិត្តស្កក.

ជួនប្រឹងគ្រហឹម. ញញឹមឡាយឡក. ដូចឆៃយ៉ាំឡក.

ស្ទើរពុលខួរក្បាល។

សង្ឃឹមខ្លាំងពេក. រំពឹងថាមេឃ. ចិត្តមិនស្រើបស្រាល.

បានត្រឹមជ្រើមជ្រួល. ចិត្តអួលហេលហាល. តឹងក្ដឹះខួរក្បាល.

ផឹកស្រាចំបែង។

នេះហើយក្រុមស្ទាវ. គេមិនទាន់គ្រាវ. ភ្លក់ឱ្យគ្រប់ល្បែង.

ស្រីញីអូនបង. ភ្លេចផ្ទះសំបែង. ប្រៀបបាននឹងផ្សែង.

នៅលើវេហា។

#នាងអត់ដឹងអី

នាងអើយនាងស្រី. ស្ទើរមួយរាត្រី. និយាយឥតឈប់

ជជែកបូរបាច់. យល់ថ្ងៃថាយប់. ថយថែមបង្គ្រប់

ធើឯងគ្រាន់បើ។

នាងអើយ អើយនាង. ទឹកត្រីក្នុងពាង. ទឹកសៀងត្រីឆ្អើរ

មិនយល់មិនដឹង. ម្ដេចប្រឹងហៃអើ. ស្រមៃស្រមើ

ដូចនាងចេះហួស។

ឱ្យជាតិពឹងអី. បើមានតែស្រី. សម្ដីពីរោះ

មុខមាត់ស្អាតបាទ. រាងសមកម្ពស់. នាំជាតិអាប់យស

ព្រោះអត់ដឹងស្អី។