ក្រុមស្ត្រីនៃអង្គការសង្គមស៊ីវិលបានរកឃើញថា កង្វះការទទួលយកពីគណបក្សនយោបាយនិងបញ្ហាប្រឈមផ្សេងទៀតបានកាត់បន្ថយជោគជ័យរបស់ស្ត្រីក្នុងវិស័យនយោបាយ ទោះបីជាមានការចូលរួមកាន់តែច្រើនក៏ដោយ។
ថ្លែងក្នុងសន្និសីទសារព័ត៌មានពីម្សិលមិញ កញ្ញា សង្វា ភួងវីណា ប្រធានតស៊ូមតិនិងបណ្ដាញនៃអង្គការហ្គេតស៊ី (GADC) បានលើកឡើងថា ទោះបីជាចំនួនបេក្ខជនជាស្ត្រីឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៧ មានការកើន៧.២ភាគរយ ប៉ុន្តែចំនួននេះនៅតែមានគម្លាតឆ្ងាយគ្នារវាងបុរសនិងស្ត្រី។ រីឯស្ត្រីជាប់ឆ្នោតជាតំណាងរាស្ត្របានថយចុះគួរកត់សម្គាល់។
កញ្ញាបន្តថា ការថយចុះនេះដោយសារមានការប្រឈមកង្វះឆន្ទៈនយោបាយរបស់គណបក្ស និងការប្តេជ្ញាចិត្តខ្ពស់របស់អ្នកដឹកនាំ ជាពិសេសគណបក្សដែលមានសំឡេងគាំទ្រច្រើនមិនជំរុញសមភាពយេនឌ័រក្នុងវិស័យនយោបាយ។ ក្នុងនោះគណបក្សប្រជាជនកម្ពុជានិងគណបក្សហ៊្វុនស៊ិនប៉ិចដាក់បេក្ខជនស្ត្រីឈរឈ្មោះក្នុងចំនួនតិចតួចសម្រាប់ការបោះឆ្នោតនីតិកាលទី៧។
កញ្ញាបន្ថែមថា បញ្ហាប្រឈមបន្ថែមលើសពីនេះ គឺនៅក្នុងគណបក្សនយោបាយខ្វះគោលនយោបាយសមភាពយេនឌ័រជាក់លាក់ជាលាយលក្ខណ៍អក្សរ។ មិនមានចែងជាក់លាក់អំពីវិធានការពិសេសក្នុងមាត្រាមួយចំនួននៃច្បាប់បោះឆ្នោត ដើម្បីគាំទ្រនិងផ្ដល់ឱកាសដល់ស្ត្រីចូលរួមដោយស្មើគ្នានឹងបុរសក្នុងវិស័យនយោបាយ ជាពិសេសការឈរឈ្មោះជាបេក្ខជននិងជាប់ឆ្នោតក្លាយជាអ្នកដឹកនាំ។
កញ្ញានិយាយថា៖ «រចនាសម្ព័ន្ធនៃការគ្រប់គ្រងភាគច្រើនលើសលុបជាបុរស ហើយបុរសនៅតែបន្តរក្សាតំណែង របស់ខ្លួន ដែលធ្វើឱ្យឱកាសទទួលបានមុខតំណែងរបស់ស្ត្រីកាន់តែរួមតូច។ ចំណែកថវិកាក៏ជាបញ្ហាប្រឈមសម្រាប់ស្ត្រីឈរឈ្មោះជាបេក្ខជន ដែលគណបក្សតម្រូវឱ្យចំណាយលើការឃោសនាបោះឆ្នោត។ នេះជាឧបសគ្គដ៏ធំបំផុតមួយដែលស្ត្រីបានប្រឈម»។
កញ្ញាបន្តថា៖ «បទដ្ឋានវប្បធម៌និងសង្គមមួយចំនួនដែលមានផ្នត់គំនិតអវិជ្ជមានក្នុងការលើកកម្ពស់ភាពជាអ្នកដឹកនាំរបស់ស្ត្រី គឺជាឫសគល់បញ្ហាបង្កជារនាំងរារាំងដល់ការចូលរួមរបស់អ្នកនយោបាយស្តីប្រកបដោយគុណភាពនិងប្រសិទ្ធភាព»។
លោកស្រី សឺនកេត សិរីលក្ខណ៍ អ្នកសម្របសម្រួលកម្មវិធីអប់រំនិងយេនឌ័ររបស់ខុមហ្វ្រែល បាននិយាយថា ដើម្បីដោះស្រាយបញ្ហាប្រឈមនេះ ក្រុមស្ត្រីនៃអង្គការសង្គមស៊ីវិលត្រូវស្នើគណបក្សនយោបាយដាក់បញ្ចូលបេក្ខជនបម្រុងឱ្យបានជាប់ជាតំណាងរាស្ត្រសម្រាប់នីតិកាលទី៧ ហើយគណបក្សទាំងអស់ធានាការបង្កើតគោលនយោបាយសមភាពយេនឌ័រនៅក្នុងបក្ស។
លោកស្រីបន្តថា៖ «យើងស្នើរដ្ឋាភិបាលគួរបង្កើនចំនួនស្ត្រីជាថ្នាក់ដឹកនាំ និងមានតួនាទីសម្រេចចិត្តនៅក្នុងក្រសួងស្ថាប័ននីមួយៗយ៉ាងហោច៣៥ភាគរយ ដោយគិតពីតួនាទីប្រធាននាយកដ្ឋានរហូតដល់រដ្ឋមន្ត្រី និងឧបនាយករដ្ឋមន្ត្រី ដើម្បីចូលរួមពិភាក្សាស្វែងរកដំណោះស្រាយ។ យើងស្នើរដ្ឋាភិបាលគួរបង្កើនការវិនិយោគនិងផ្ដល់គាំទ្រគ្រប់បែបយ៉ាងជាលក្ខណៈប្រព័ន្ធ ដូចជាធនធានថវិកានិងធនធានមនុស្សដល់អ្នកដឹកនាំស្ត្រីនិងស្ត្រីជាប់ឆ្នោត ដើម្បីបង្កើនគុណភាពចូលរួមនយោបាយ»។
បន្ថែមពីនេះលោកស្រីបានស្នើទៅរដ្ឋសភានិងព្រឹទ្ធាធានាថាច្បាប់បោះឆ្នោតជ្រើសតាំងតំណាងរាស្ត្រនិងក្រុមប្រឹក្សាឃុំសង្កាត់ឱ្យឆ្លើយតបនឹងយេនឌ័រដែលមានចែងពីវិធានការពិសេស ដើម្បីសមភាពយេនឌ័រនិងផ្ដល់ឱកាសដល់ស្ត្រីចូលរួមដោយស្មើភាពក្នុងវិស័យនយោបាយ។
លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា បានលើកឡើងថា គណបក្សបានយកចិត្តទុកដាក់លើកកម្ពស់តួនាទីស្ត្រី។ ដូច្នេះការកសាងធនធានមនុស្សមានទាំងបុរសនិងស្ត្រីស្របតាមគោនយោបាយរបស់រដ្ឋាភិបាលដែលកាន់កាប់ដោយគណបក្សប្រជាជនកម្ពុជា ក៏ប៉ុន្តែការកសាងធនធានមនុស្សផ្អែកលើលក្ខណៈសម្បត្តិរបស់បុគ្គលម្នាក់ៗ។
លោកបន្តថា ផ្អែកលើករណីនេះ គឺមិនមែនចេះដាក់បេក្ខជនស្ត្រីដើម្បីបានចំនួនច្រើន ហើយមិនមានសមត្ថភាព គ្មានគោលជំហរការងារច្បាស់លាស់សម្រាប់បម្រើប្រជាជន។ ដូច្នេះបក្សជ្រើសរើសស្ត្រីដែលមានលក្ខណៈសម្បត្តិគ្រប់គ្រាន់ ដើម្បីបានទទួលការតែងតាំង ហើយបំពេញតួនាទីភារកិច្ចប្រកបដោយប្រសិទ្ធភាពនិងប្រសិទ្ធផលការងារ។
លោក សុខ ឥសាន្ត បានឆ្លើយតបនឹងការស្នើសុំគណបក្សដាក់បញ្ចូលបេក្ខជនបម្រុងឱ្យជាប់ជាតំណាងរាស្ត្រសម្រាប់នីតិកាលទី៧ថា៖ «ខាងអង្គការសង្គមស៊ីវិលមិនទាន់យល់អំពីការរៀបចំបេក្ខជន ហើយការយកបេក្ខជនបម្រុងឱ្យជាប់តំណាងរាស្ត្របានប្រយោជន៍អ្វី។ គេទទួលយកតែបេក្ខជនពេញសិទ្ធិប៉ុណ្ណោះ ជាប់ជាតំណាងរាស្ត្រ គឺមិនមែនបេក្ខជនបម្រុងជាប់ជាតំណាងរាស្ត្រទេ»។
ការបោះឆ្នោតជ្រើសតាំងតំណាងរាស្ត្រនីតិកាលទី៧ មានគណបក្សនយោបាយចំនួន១៨ បានដាក់បេក្ខជនប្រកួតប្រជែកចំនួន ១ ៦១៤នាក់។ ក្នុងនោះមានបេក្ខជនជាស្ត្រី៣២.៤ភាគរយ ឬស្មើនឹង៥២៣នាក់។ ចំនួននេះកើន៧.២ភាគរយ បើធៀបនឹងនីតិកាលទី៦ ដែលមានចំនួន២៥.២ភាគរយ ឬស្មើនឹង៤៩៨នាក់នៃបេក្ខជនប្រកួតប្រជែងចំនួន ១ ៩៧២នាក់មកពីគណបក្សនយោបាយចំនួន២០ដែលបានចូលរួមប្រកួតប្រជែង។
ចំនួនបេក្ខជនជាស្ត្រីកើនឡើងនេះ ដោយសារតែបក្សនយោបាយដែលធ្លាប់ចូលរួមប្រកួតប្រជែងការបោះឆ្នោតនីតិកាលទី៦បានបង្កើនបេក្ខជនស្ត្រីក្នុងនីតិកាលទី៧ ហើយគណបក្សថ្មីដែលទើបតែចូលរួមប្រកួតការបោះឆ្នោតនីតិកាលទី៧បានដាក់បេក្ខជនជាស្ត្រីច្រើនលើកលប់។ ចំណែកគណបក្សប្រជាជនកម្ពុជានិងហ្វ៊ុនស៊ិនប៉ិចបែរជាដាក់បេក្ខជនជាស្ត្រថយចុះទៅវិញ។
តាមលទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី៧ របស់គណៈកម្មាធិការជាតិរៀបចំការបោះឆ្នោត បានបង្ហាញថា សមាជិកសភាសម្រាប់នីតិកាលទី៧ មកពីគណបក្សប្រជាជនកម្ពុជាបានគ្របដណ្ដប់ដោយបុរសចំនួន១០៩នាក់ ឬស្មើនឹង៨៧.២ភាគរយ និងស្ត្រី១២.៨ភាគរយនៃ១២០អាសនៈ និង៥អាសនៈក្នុងរដ្ឋសភាគ្របដណ្ដប់ដោយបុរសមកពីគណបក្សហ៊្វុនស៊ីនប៉ិច។
ចំនួនបុរសក្នុងសភាសម្រាប់អាណត្តិនេះមានការកើនឡើងនិងស្ត្រីមានការថយចុះបន្តិចបើធៀបនឹងសមាជិកសភាសម្រាប់នីតិកាលទី៦ ដែលគ្របដណ្ដប់ដោយបុរសចំនួន១០៦ ឬស្មើនឹង៨៤.៨ភាគរយ និងស្ត្រីចំនួន១៩នាក់ ឬស្មើនឹង១៥.២ភាគរយមកពីគណបក្សប្រជាជនកម្ពុជាទាំងអស់។
ស្ដ្រីដែលជាប់ឆ្នោតតំណាងរាស្ត្រទាំងនេះស្ថិតនៅក្នុងគណបក្សប្រជាជនកម្ពុជាទាំងអស់។ ក្នុងចំណោមពួកគេបានឈរឈ្មោះបោះឆ្នោតថ្នាក់ជាតិនៅខេត្តបន្ទាយមានជ័យចំនួនម្នាក់ នៅកំពង់ឆ្នាំងចំនួនម្នាក់ នៅកំពង់ស្ពឺចំនួនម្នាក់ នៅកំពតចំនួនពីរនាក់ នៅកណ្ដាលចំនួនម្នាក់ នៅភ្នំពេញចំនួនបីនាក់ នៅព្រៃវែងចំនួនម្នាក់ នៅសៀមរាបចំនួនម្នាក់ នៅស្វាយរៀងចំនួនបីនាក់ និងនៅមណ្ឌលខេត្តតាកែវចំនួនពីរនាក់៕
No comments:
Post a Comment