សមាជិកសភាសម្រាប់នីតិកាលទី៧ បានគ្របដណ្ដប់ដោយបុរសចំនួន១០៩នាក់ ឬស្មើនឹង៨៧.២ភាគរយ និងស្ត្រីមានតែ១២.៨ភាគរយនៃអាសនៈសភាចំនួន១២៥។ ចំនួនបុរសក្នុងសភាសម្រាប់អាណត្តិនេះមានការកើនឡើងនិងស្ត្រីមានការថយចុះបន្តិចបើធៀបនឹងសមាជិកសភាសម្រាប់នីតិកាលទី៦ ដែលគ្របដណ្ដប់ដោយបុរសចំនួន១០៦ ឬស្មើនឹង៨៤.៨ភាគរយ និងស្ត្រីចំនួន១៩នាក់ ឬស្មើនឹង១៥.២ភាគរយ។
លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រនីតិកាលទី៧ របស់គណៈកម្មាធិការជាតិរៀបចំការបោះឆ្នោត បានបង្ហាញថា ស្ដ្រីដែលបានជាប់ឆ្នោតរាស្ត្រក្នុងអាណត្តិនេះមានចំនួន១៦រូបឬស្មើនឹង១២.៨ភាគរយនៃអាសនៈសភា។
ស្ដ្រីដែលជាប់ឆ្នោតតំណាងរាស្ត្រទាំងនេះស្ថិតនៅក្នុងគណបក្សប្រជាជនទាំងអស់។ ក្នុងចំណោមពួកគេបានឈរឈ្មោះបោះឆ្នោតថ្នាក់ជាតិនៅខេត្តបន្ទាយមានជ័យចំនួនម្នាក់ នៅកំពង់ឆ្នាំងចំនួនម្នាក់ នៅកំពង់ស្ពឺចំនួនម្នាក់ នៅកំពតចំនួនពីរនាក់ នៅកណ្ដាលចំនួនម្នាក់ នៅភ្នំពេញចំនួនបីនាក់ នៅព្រៃវែងចំនួនម្នាក់ នៅសៀមរាបចំនួនម្នាក់ នៅស្វាយរៀងចំនួនបីនាក់ និងនៅមណ្ឌលខេត្តតាកែវចំនួនពីរនាក់។
លោក សួស យ៉ារ៉ា នាំពាក្យគណបក្សប្រជាជនកម្ពុជាបានលើកឡើងថា បក្សបានដាក់បេក្ខជនស្ត្រីឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៧ នៅតាមមណ្ឌលបោះឆ្នោតនានានៅទូទាំងប្រទេស ប៉ុន្តែការជាប់ឆ្នោតឬមិនជាប់ឆ្នោត គឺអាស្រ័យលើការបោះឆ្នោតគាំទ្រដោយប្រជាជន។ ដូច្នេះវាមិនមែនបានសេចក្ដីថា ការដាក់ស្ត្រីឈរឈ្មោះបោះឆ្នោតមានការធ្លាក់ចុះនោះទេ។
លោកបាននិយាយថា៖ «នេះជាសិទ្ធិប្រជាជនបានជ្រើសរើស ហើយតាមរយៈការជ្រើសរើសនេះមានការប្រែប្រួលទៅតាមមណ្ឌលដែលពួកគាត់បានឈរឈ្មោះ។ ដូច្នេះអ្នកជាប់ឆ្នោតជាស្ត្រីចំនួន១៦រូបនេះ គឺតំណាងស្ត្រីក្នុងប្រទេសកម្ពុជា។ ប៉ុន្តែមិនមែនតែ១៦រូបនេះទេ ព្រោះនៅមានតំណាងស្ដ្រីមួយចំនួនទៀតបានធ្វើការងារនៅតាមស្ថាប័ននីតិបញ្ញត្តិ នីតិប្រតិបត្តិ និងនៅក្នុងតុលាការ»។
លោកបន្តថា៖ «តាមរយៈនេះនៅមានការតំណាងស្ត្រីច្រើនមកពីគណបក្សប្រជាជនកម្ពុជាដែលបានគ្រប់គ្រងអំណាច»។
លោកបានបញ្ជាក់ថា គណបក្សប្រជាជនកម្ពុជាបានជំរុញនិងលើកកម្ពស់ស្ត្រី ព្រោះបក្សនៅតែជ្រើសយកសមភាពយេនឌ័រជាអាទិភាព។ បក្សមិនបានកំណត់យកចំនួនស្ត្រីទេ គឺអាស្រ័យលើប្រជាជនបោះឆ្នោតគាំទ្រពួកគេ។ ប្រសិនបើពួកគេជាប់ការបោះឆ្នោត នោះជាអាទិភាពរបស់បក្សដែលតែងតែលើកតម្លៃនិងលើកកម្ពស់តំណាងស្ត្រីទាំងក្នុងរដ្ឋសភា នៅក្នុងស្ថាប័ននីតិបញ្ញត្តិ នីតិប្រតិបត្តិ និងនៅក្នុងស្ថាប័នតុលាការ។
ខ្មែរថាមស៍មិនអាចសុំការបញ្ជាក់ពីលោកស្រី អ៊ឹង កន្ថាផាវី ដែលជាស្ត្រីម្នាក់ក្នុងចំណោមស្ត្រីដែលបានជាប់ឆ្នោតជ្រើសតាំងតំណាងរាស្ត្រនីតិកាលទី៧។
អ្នកស្រី សុខ មុនី នាយិការខុទ្ទកាល័យរដ្ឋមន្ត្រីក្រសួងកិច្ចការនារី បាននិយាយថា គាត់ជាស្ត្រីម្នាក់ដែលបានជាប់ឆ្នោតជ្រើសតាំងតំណាងរាស្ត្រនៅមណ្ឌលបោះឆ្នោតរាជធានីភ្នំពេញ ហើយគាត់រក្សាតំណែងរដ្ឋាមន្ត្រីក្រសួងកិច្ចការនារីបន្តពីអាណត្តិមុន។
អ្នកស្រីនិយាយថា៖ «ខ្ញុំគ្រាន់តែដឹងថានៅអាណត្តិថ្មីនេះ ទោះពិតមែនគាត់ជាតំណាងរាស្ត្រ ប៉ុន្តែគាត់នៅតែជារដ្ឋមន្ត្រីក្រសួងកិច្ចការនារីដដែល»។
លោក សំ គន្ធាមី យកប្រតិបត្តិរបស់អង្គការឃ្លាំមើលការបោះឆ្នោត Nicfec កត់សម្គាល់ឃើញថា ការបោះឆ្នោតលើកនេះ ការរៀបចំសមាសភាពមិនដូចនឹងអាណត្តិមុនទេ ដោយសមាសភាពស្ត្រីមិនមានតុល្យភាពគ្នាទេ។
លោកនិយាយថា៖ «ស្ត្រីមានចំនួនតិចជាងបុរស។ មូលហេតុដោយសារតែខាងបក្សរបស់គេជាអ្នករៀបចំដាក់បេក្ខជនគណបក្ស»។
ការបោះឆ្នោតជ្រើសតាំងតំណាងរាស្ត្រនីតិកាលទី៧នៅថ្ងៃទី២៣ ខែកក្កដា ឆ្នាំ២០២៣ ហើយមានគណបក្សនយោបាយចំនួន១៨ បានចូលរួមប្រកួតប្រជែងដើម្បីទទួលបានអាសនៈទាំង១២៥ក្នុងរដ្ឋសភា ប៉ុន្តែមានតែគណបក្សចំនួនពីរប៉ុណ្ណោះដែលទទួលបានអាសនៈនៅក្នុងរដ្ឋសភា គឺគណបក្សប្រជាជនកម្ពុជាទទួលបាន១២០អាសនៈ និងគណបក្សហ្វ៊ុនស៊ិនប៉ិចទទួលបាន៥អាសនៈ៕
ថ្ងៃនេះ កូនអត់ទ្រាំបាន... អ្នកដទៃអត់ទ្រាំមិនបាន។ បើកូនអត់ទ្រាំបានចំពោះរឿងដែលអ្នកដទៃអត់ទ្រាំមិនបាននៅថ្ងៃនេះ។ នៅថ្ងៃស្អែកកូនប្រាកដជាសម្រេចកិច្ចការដែលអ្នកដទៃសម្រេចមិនបាន កូននឹងមានឈ្មោះថា ជោគជ័យ...
ស្ត្រីជាប់ឆ្នោតតំណាងរាស្ត្រសម្រាប់នីតិកាលទី៧មាន១២.៨ភាគរយ ជាចំនួនតិចនៅឡើយបើធៀបនឹងបុរស
Subscribe to:
Post Comments (Atom)
No comments:
Post a Comment