ជង្រុកស្រូវជាផ្នែកមួយក្នុងជីវិតប្រចាំថ្ងៃរបស់ប្រជាជនពីជំនាន់ដើម។ វាអាចបង្ហាញពីសេដ្ឋកិច្ទគ្រួសាររីកចម្រើនឬមិនរីកចម្រើន។
យោងតាមនរភាសាវិទ្យាសម័យទំនើបដែលខ្ញុំធ្លាប់បានសិក្សានៅសាកលវិទ្យាល័យបានបញ្ជាក់ថា ប្រសិនបើគេនិយាយពីសេដ្ឋកិច្ចគ្រួសារមនុស្សជំនាន់ដើម គឺគេពិនិត្យមើលលើជង្រុកស្រូវ។
គេតែងនិយាយថា អ្នកនេះជាអ្នកស៊ីអង្ករគីឡូ ឬអ្នកនោះស៊ីអង្ករជង្រុក។ គឺគេសំដៅដល់អ្នកស៊ីអង្ករគីឡូជំនាន់នោះ ជាអ្នកមានសេដ្ឋកិច្ចគ្រួសារមិនសូវធូរធារ រីឯអ្នកស៊ីអង្ករជង្រុកជាអ្នកមានសេដ្ឋកិច្ចគ្រួសាររីកចម្រើន ប៉ុន្តែឥឡូវមិនដូច្នេះទៀតឡើយ។
ពាក្យ "ជង្រុក" ខ្ញុំឆែកទាំងក្នុងវចនានុក្រមខ្មែរទើបធ្វើបច្ចុប្បន្នកម្មដោយក្រុមប្រឹក្សាជាតិភាសាខ្មែរនិងវចនានុក្រមខ្មែរបោះពុម្ពដោយពុទ្ធសាសនបណ្ឌិត្យ ប៉ុន្តែពុំប្រទះសោះឡើយ។ ទាល់តែវាយបញ្ចូលពាក្យ "ក្រង់" ទើបឃើញពាក្យ "ជង្រុក"។ វាគួរតែជាមេពាក្យក្នុងវចនានុក្រមខ្មែរ?
លំនាំគ្នានេះ ដែលពីមុនពាក្យ "ស្រូវ" ខ្ញុំឆែកវចនានុក្រមខ្មែរបោះពុម្ពដោយពុទ្ធសាសនបណ្ឌិត្យពុំឃើញមានទេ លុះត្រាតែវាយពាក្យ "អង្ករ" ទើបប្រទះឃើញពាក្យ "ស្រូវ"។ ក្រោយមកក្រុមប្រឹក្សាជាតិភាសាខ្មែរបានធ្វើបច្ចុប្បន្នកម្មវចនានុក្រមខ្មែរដោយបានបញ្ចូលពាក្យ "ស្រូវ" ធ្វើជាមេពាក្យ។
