ក្រសួងអប់រំ យុវជន និងកីឡា អះអាងថា អត្រាសិស្សបង់បោះការសិក្សាមានចំនួនតិចនិងកត្តាកំណើនសិស្សចូលរៀនច្រើន ជាមូលហេតុធ្វើឱ្យចំនួនបេក្ខជនប្រឡងសញ្ញាបត្រមធ្យមសិក្សាបឋមភូមិឬឌីប្លូមមានការកើនឡើងនៅក្នុងឆ្នាំនេះ។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់ខ្មែរថាមស៍ពីម្សិលមិញថា ឆ្នាំនេះមានបេក្ខជនចំនួន ១៧៨ ១៣៤នាក់ បានដាក់ពាក្យចូលរួមប្រឡងសញ្ញាបត្រមធ្យមសិក្សាបឋមភូមិ។ ចំនួននេះមានការកើនឡើងកើនឡើងជាង ៣ ០០០នាក់ បើធៀបនឹងឆ្នាំមុន។
ក្រសួងអប់រំ យុវជន និងកីឡា បានកំណត់កាលបរិច្ឆេទថ្ងៃទី២ និងថ្ងៃទី៣ ខែតុលា សម្រាប់ការប្រឡងសញ្ញាបត្រមធ្យមសិក្សាបឋមភូមិឆ្នាំនេះ។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បាននិយាយថា៖ «ចំនួនដែលកើនឡើងនេះ គឺចំនួនសិស្សក្នុងចំណេះទូទៅ»។
លោកស្រីបន្តថា៖ «ចំនួននេះមានការកើនឡើង ព្រោះក្នុងកំណែទម្រង់អប់រំកន្លងមក ពិសេសក្រោមកិច្ចខិតខំរបស់ក្រសួងរយៈពេលច្រើនឆ្នាំមកនេះ ក៏ដូចជាមន្ទីរអប់រំ សាលារៀន និងការចូលរួមគាំទ្រពីសហគមន៍ធ្វើឱ្យអត្រាសិស្សចូលរៀនមានកំណើន អត្រាសិស្សបោះបង់សិក្សាតិច ទើបចំនួនមានការកើនឡើង»។
អ្នកស្រីបន្ថែមថា កត្តាសំខាន់មួយទៀតដែលចួលរួមជំរុញកំណើនសិស្ស គឺកម្មវិធីគ្រប់គ្រងសាលារៀនដែលមានសូចនាករជាច្រើនដែលបានជំរុញសាសារៀនត្រូវតែចូលរួមបំពេញ ព្រមទាំងការចូលរួមគាំទ្រពីសហគមន៍ដែលធ្វើឱ្យសាលារៀនមានតម្លាភាពក្នុងការបង្រៀនសិស្ស។ មិនតែប៉ុណ្ណោះសហគមន៍និងអាជ្ញាធរមូលដ្ឋានថែមទាំងបានប្រមូលសិស្សឱ្យចូលរៀនវិញដែរ។
ស្ថិតិបេក្ខជនប្រឡេងសញ្ញាបត្រមធ្យមសិក្សាបឋមភូមិរបស់ក្រសួងអប់រំក្នុងរយៈពេលបីឆ្នាំចុងក្រោយនេះ បានបង្ហាញថា ចំនួនបេក្ខជនចូលរួមប្រឡងឌីប្លូមកើនឡើងជាលំដាប់។ នៅឆ្នាំ២០២១ បេក្ខជនចូលរួមប្រឡងឌីប្លូមមានចំនួន ១៦២ ៥៨៩នាក់។ នៅឆ្នាំ២០២២ បេក្ខជនចូលរួមប្រឡងឌីប្លូមមានចំនួន ១៧៤ ៧២៦នាក់។ នៅឆ្នាំនេះ បេក្ខជនចូលរួមប្រឡងឌីប្លូមមានចំនួន ១៧៨ ១៣៤នាក់។
ឆ្នាំនេះ ក្រសួងអប់រំ យុវជន និងកីឡា បានបន្តប្រគល់សិទ្ធិអំណាចនិងការទទួលខុសត្រូវទាំងស្រុងជូនគ្រឹះស្ថានមធ្យមសិក្សានីមួយៗជាអ្នករៀបចំការប្រឡង គឺរាប់ចាប់តាំងពីការរៀបចំវិញ្ញាសាប្រឡងរហូតលដល់ការប្រកាសលទ្ធផលប្រឡងនេះក្រោមការត្រួតពិនិត្យពីមន្ត្រីជំនាញរបស់ក្រសួងអប់រំ។
ក្រសួងបានកំណត់វិញ្ញាសាចំនួន១១ សម្រាប់ការប្រឡងសញ្ញាបត្រមធ្យមសិក្សាបឋមភូមិ រួមមានតែងសេចក្ដី គីមីវិទ្យា ផែនដីនិងបរិស្ថានវិទ្យា រូបវិទ្យា ភូមិវិទ្យា សីលធម៌-ពលរដ្ឋវិជ្ជា គណិតវិទ្យា ការសរសេរតាមអាន ជីវវិទ្យា ប្រវត្តិវិទ្យា និងភាសាបរទេស។
ក្រសួងអប់រំបានបញ្ជាក់ក្នុងសេចក្ដីណែនាំថា មានករណីបីចំណុចដែលសិស្សគ្រឹះស្ថានមធ្យមសិក្សាចំណេះទូទៅសាធារណៈនិងឯកជនមិនទទួលស្គាល់ជាបេក្ខភាពប្រឡង ដោយករណីទី១សិស្សមានមធ្យមភាគពិន្ទុប្រចាំឆ្នាំក្រោម២៥,០០ ករណីទី២សិស្សគ្មានមធ្យមភាគប្រឡងឆមាស និងករណីទី៣សិស្សអវត្តមានលើចំនួនកំណត់។
ក្រសួងបានបន្តថា ការប្រកាសលទ្ធផលប្រឡងសញ្ញាបត្រមធ្យមសិក្សាបឋមភូមិនឹងធ្វើឡើងនៅថ្ងៃទី៩ ខែវិច្ឆិកា ឆ្នាំ២០២៣។
លោក យី សុងគី ប្រធានមន្ទីរអប់រំ យុវជន និងកីឡា ខេត្តបាត់ដំបង បានលើកឡើងថា បេក្ខជនចូលរួមប្រឡងសញ្ញាបត្រមធ្យមសិក្សាបឋមភូមិក្នុងខេត្តបាត់ដំបងមានការកើនឡើង ប៉ុន្តែលោកមិនអាចបញ្ជាក់ពីទិន្នន័យជាក់លាក់បានទេ។
លោកលើកឡើងថា ជាធម្មតា សិស្សចាប់ពីថ្នាក់បឋមសិក្សាដល់ថ្នាក់មធ្យមសិក្សាបឋមភូមិមានការថយចុះជាលំដាប់ដោយសារបោះបង់សិក្សា។ ដូច្នេះការកើនឡើងចំនួនបេក្ខជនចូលរួមប្រឡងសញ្ញាបត្រមធ្យមសិក្សាបឋមភូមិឆ្នាំនេះ គឺបង្ហាញពីការរក្សាបាននូវអត្រាគង់វង្សនិងបង្ហាញពីការកាត់បន្ថយអត្រាសិស្សបោះបង់សិក្សា។
លោកបាននិយាយថា៖ «កំណើនសិស្សនេះថែមទាំងបង្ហាញពីការអភិវឌ្ឍគុណភាពអប់រំនៅកម្ពុជាជឿនលឿនទៅមុខតាមរយៈការកសាងអគារសិក្សាបន្ថែម ការបង្កើនគ្រូបង្រៀន ហើយអាណាព្យាបាលសិស្សចាប់ផ្ដើមមានការយល់ដឹងពីគុណតម្លៃសិក្សារបស់កូនពួកគេជាមួយនឹងសេដ្ឋកិច្ចគ្រួសារមានភាពកាន់តែប្រសើរឡើងជាងមុន»។
លោកបន្តថា៖ «យើងមានបំណង់ចង់រក្សាអត្រាសិក្សារបស់ពួកគេរហូតបញ្ចប់បាក់ឌុប ប៉ុន្តែនៅក្នុងច្បាប់របស់យើង គឺយ៉ាងហោចណាស់ប្រជាពលរដ្ឋខ្មែរត្រូវបញ្ចប់សិក្សាត្រឹមថ្នាក់ទី៩ (អនុវិទ្យាល័យ) ដែលជាការបញ្ចប់ការអប់រំមូលដ្ឋាន»។
លោកបញ្ជាក់ថា នៅពេលនេះ មន្ទីរអប់រំខេត្តបាត់ដំបងកំពុងរៀបចំការប្រឡងសញ្ញាបត្រមធ្យមសិក្សាបឋមភូមិនៅតាមគ្រឹះស្ថានសិក្សានានា ព្រមទាំងគណៈមេប្រយោគ ឯកសារវិញ្ញាសា និងសេចក្ដីណែនាំផ្សេងៗទៀត ហើយការប្រឡងនេះមានស្ដង់ដាដូចការប្រឡងបាក់ឌុប ប៉ុន្តែមានការបន្ធូរបន្ថយវិញ្ញាសាបន្តិច ដើម្បីពួកគេប្រឡងជាប់ ហើយបន្តសិក្សារបស់ពួកគេនៅថ្នាក់វិទ្យាល័យ។
អ្នកស្រី អ៊ុក ឆាយ៉ាវី ប្រធានសមាគមគ្រូបង្រៀនឯករាជ្យកម្ពុជា មិនមានការភ្ញាក់ផ្អើលចំពោះអត្រាកំណើននេះទេ ដោយអ្នកស្រីយល់ថា ជាទូទៅនៅពេលដែលប្រជាជនកើនឡើង នោះអត្រាសិស្សចូលរៀននឹងមានកើនឡើង។ ដូច្នេះការកើនឡើងនេះពុំមែនបញ្ជាក់ថា ដោយសារអត្រាសិស្សបោះបង់ទាបទេ។
អ្នកស្រីមានលើកហេតុផលមួយចំនួនដែលនាំសិស្សនៅតែប្រឈមនឹងការបោះបង់សិក្សា ដូចជាកត្តាជីវភាពក្រីនិងនៅតាមគ្រឹះស្ថានសិក្សាសាធារណៈមួយចំនួនតម្រូវឱ្យសិស្សបានបង់ថវិកាដើម្បីចូលរៀន។
អ្នកស្រីបានលើកឡើងថា៖ «ការដាក់ពាក្យចូលរួមប្រឡងច្រើន គឺមិនមែនមកពីការកាត់បន្ថយការបោះបង់សិក្សាសិស្សទេ ព្រោះជាធម្មតាមនុស្សកើនកើនកាន់តែច្រើន គឺត្រូវតែមានដំណាក់កាលមួយដែលមានសិស្សចូលរៀនច្រើន ប៉ុន្តែបើយើងសង្កេតមើលតាមសាលារៀននីមួយៗ សិស្សបោះបង់ការសិក្សាក៏ច្រើនដែរ។ មូលហេតុដោយសារភាពក្រីក្ររបស់ពួកគាត់ ការចំណាក់ស្រុក ដែលជាហេតុធ្វើឱ្យសិស្សបោះបង់ការសិក្សា»។
លោក គួច ម៉េងលី អ្នកជំនាញអប់រំដ៏ល្បី បាននិយាយថា នេះជាចំណុចដ៏ល្អមួយដែលបញ្ជាក់ថាសិស្សានុសិស្សចូលរៀនពេញលេញឡើងវិញ និងបញ្ជាក់សិស្សានុសិស្សមិនបានបោះបង់សិក្សាបន្ទាប់ពីការរាតត្បាតជំងឺកូវីដ-១៩។
លោកបន្តថា ការកើនឡើងនេះទោះបញ្ជាក់ពីសិស្សបោះបង់សិក្សាមានចំនួនតិច ប៉ុន្តែការកើនឡើងសិស្សមានចំនួនក៏មិនសូវជាច្រើនខ្លាំងណាស់ណាដែរ។ ប្រសិនបើនៅឆ្នាំបន្ទាប់ ចំនួនសិស្សកើនឡើងប្រមាណមួយម៉ឺននាក់ទើបអាចវាយតម្លៃថាជាការកើនឡើងច្រើន។
លោកបន្ថែមថា៖ «ទោះយ៉ាងណាយើងអាចវាយតម្លៃថាសិស្សានុសិស្សបានចាប់ផ្ដើមចូលរៀនជាធម្មតាវិញក្រោយពីការរាតត្បាតជំងឺកូវីដ-១៩ ហើយចំនួនសិស្សចូលរៀនឡើងវិញ គឺមានចំនួននៅស្ថិតស្ថេរដដែល»។
លោកបន្ថែមថា៖ «ទោះបីជាវាមិនកើនឡើង ក៏នៅតែជាចំណុចវិជ្ជមានមួយដែលបញ្ជាក់ថា សិស្សានុសិស្សយើងមិនបោះបង់សិក្សា សូម្បីមានការរាត្បាតជំងឺកូវីដ-១៩ ក៏ដោយ»៕
 |
| បេក្ខជនចូលរួមប្រឡងសញ្ញាបត្រមធ្យមសិក្សាបឋមភូមិនៅឆ្នាំ២០២១។ រូបភាព៖ ក្រសួងអប់រំ |