លោកនាយករដ្ឋមន្ត្រី ហ៊ុន សែន បានប្រកាសពន្យារពេលជួបជាមួយកម្មករដោយលើកឡើងថា នាយករដ្ឋមន្ត្រីថ្មីនឹងអាចជំនួសតួនាទីរបស់លោក បន្ទាប់ពីការបង្កើតរដ្ឋាភិបាលថ្មីរួច។
លោកនាយករដ្ឋមន្ត្រី ហ៊ុន សែន ពីម្សិលមិញបានផ្ញើសារជាសំឡេងតាមតេឡេក្រាមដោយសូមអភ័យទោសចំពោះកម្មករទាំងអស់ដែលលោកត្រូវខកខានមិនបានចុះសួរសុខទុក្ខតាមការសន្យានៅក្រោយការបោះឆ្នោតថ្នាក់ជាតិកន្លងទៅនេះ។
ក្នុងសារសំឡេងប្រមាណជិតបួននាទី លោក ហ៊ុន សែន បានលើកឡើងថា បន្ទាប់ពីបោះឆ្នោតជ្រើសតាំងតំណាងរាស្ត្រនីតិកាលទី៧ហើយ លោកបានសន្យាថានឹងចុះជួបសួរសុខទុក្ខកម្មករចំនួន១០គោលដៅជាបន្តទៀតនៅក្រុងភ្នំពេញនិងបណ្ដាខេត្តនៅថ្ងៃទី២៧ ខែកក្កដា។ ប៉ុន្តែគម្រោងដែលបានសន្យានេះ ត្រូវបានផ្អាកទៅវិញដោយសារមិនទាន់មានពេលវេលាគ្រប់គ្រាន់ និងកត្តាទាក់ទងនឹងទិដ្ឋភាពនៃការរៀបចំរដ្ឋាភិបាលថ្មី។
លោកបាននិយាយថា៖ «ផែនការចុះជួបជាមួយកម្មករត្រូវបានខកខានមិនបានចុះសួរសុខទុកតាមសន្យា»។
លោកបានបន្តថា៖ «កិច្ចការនេះត្រូវបានលើកទៅពេលក្រោយបង្កើតរដ្ឋាភិបាលថ្មី ព្រោះឥឡូវនេះស្ថិតនៅក្នុងដំណាក់កាលនៃរដ្ឋភិបាលចាំផ្ទះ (រដ្ឋាភិបាលចាស់)»។
លោកបានបញ្ជាក់ថា លោកនឹងចុះសួរសុខទុក្ខកម្មករនៅក្រោយការបង្កើតរដ្ឋាភិបាលថ្មី ហើយលទ្ធភាពខ្ពស់បំផុតដែលមាននាយករដ្ឋមន្ត្រីថ្មីនឹងចុះសួរសុខទុក្ខចំពោះកម្មករជំនួសនាយករដ្ឋមន្ត្រីចាស់។
វាជាកាព្វកិច្ចដែលនឹងកើតឡើងនៃរដ្ឋាភិបាលថ្មីត្រូវដឹងពីសុខទុក្ខប្រជាពលរដ្ឋនិងកម្មកររោងចក្រ។ លោកនឹងបកស្រាយដែលត្រូវបានផ្អាកការចុះជួបកម្មករឱ្យច្បាស់លាស់នៅថ្ងៃទី៣ ខែសីហាខាងមុខ នៅក្នុងអំឡុងពេលសម្ពោធផ្លូវខ្សែក្រវ៉ាត់ក្រុងភ្នំពេញ។
ទោះក្នុងសារសំឡេងលោក ហ៊ុន សែន មិនបានបញ្ចេញឈ្មោះនាយករដ្ឋមន្រ្តីថ្មី ប៉ុន្តែលោកបានព្រលយក្នុងកិច្ចសម្ភាសជាមួយកាសែតនៃទូរទស្សន៍ phoenix ដែលមានមូលដ្ឋាននៅទីក្រុងហុងកុងថា លោក ហ៊ុន ម៉ាណែត នឹងអាចទទួលតំណែងជានាយករដ្ឋមន្រ្តីថ្មីនៅក្រោយប្រកាសលទ្ធផលឆ្នោតជាផ្លូវការ៕
No comments:
Post a Comment