លោក ហ៊ុន សែន ប្រកាសថា នឹងលាលែងពីតំណែងនាយករដ្ឋមន្រ្តី ហើយជំនួសដោយលោក ហ៊ុន ម៉ាណែត
លោក ហ៊ុន សែន ពីម្សិលមិញបានប្រកាសថា លោកនឹងលាលែងពីនាយករដ្ឋមន្រ្តីនាអាណត្តិទី៧នេះ ហើយលោក ហ៊ុន ម៉ាណែត នឹងក្លាយជានាយករដ្ឋមន្រ្តីជំនួសលោក។
នៅក្នុងសន្និសីទកាសែតចេញពីគេហដ្ឋានរបស់លោកពីម្សិលមិញដោយលោកនិយាយថា៖ «ខ្ញុំព្រះករុណាខ្ញុំនឹងមិនបន្តមុខតំណែងជានាយករដ្ឋមន្ត្រីនោះទេ»។
លោកបន្តថា ចំណែកលោក ស ខេង លោក ទៀ បាញ់ អ្នកស្រី ម៉ែន សំអន និងឧបនាយករដ្ឋមន្ត្រីមួយចំនួនទៀត ក៏នឹងចាកចេញពីតំណែងរបស់ពួកគេដែរ។
លោកបន្ថែមថា ការណ៍ដែលលោកប្រញាប់ប្រញាល់លាឈប់ពីតំណែងជានាយករដ្ឋមន្ត្រី គឺជាការរៀបចំទុកជាមុនសម្រាប់ការរក្សាស្ថេរភាពរយៈពេលវែងដែលជាមូលដ្ឋានគ្រឹះសម្រាប់ការអភិវឌ្ឍ។
លោកបន្ថែមថា ប្រសិនជាលោកបន្តធ្វើជានាយករដ្ឋមន្ត្រីក្នុងមួយឬពីរឆ្នាំ នោះសភាពការណ៍នឹងអស្ថេរភាពក្នុងមួយរយៈកាល។ ដូច្នេះវាមានការចាំបាច់ណាស់ ដើម្បីបង្កើតគណរដ្ឋមន្ត្រីថ្មីមួយដែលភាគច្រើនជាមនុស្សវ័យក្មេងទទួលខុសត្រូវសម្រាប់អនាគតប្រទេសជាតិ ដោយមានមន្ត្រីរដ្ឋាភិបាលចាស់នឹងនៅជួយជ្រោមជ្រែងពីខាងក្រោយ ប៉ុន្តែមិនជ្រៀតជ្រែកការងាររបស់រដ្ឋាភិបាលថ្មីទេ។
លោកបានបញ្ជាក់ថា លោក ហ៊ុន ម៉ាណែត ដែលជាកូនច្បងរបស់លោកនឹងទទួលតំណែងជានាយករដ្ឋមន្ត្រីថ្មី គឺមិនបានរំលងនីតិវិធីទាំងឡាយនោះឡើយ។ លោក ហ៊ុន ម៉ាណែត បានជាប់ឆ្នោតជាអ្នកតំណាងរាស្ត្ររួចហើយ ទោះពេលនេះអ្នកតំណាងរាស្ត្រទាន់ជួបប្រជុំជាមួយព្រះមហាក្សត្រនិងស្បថចូលកាន់តំណែង។
លោកបាននិយាយថា៖ «ព្រះមហាក្សត្របានទទួលយកនូវសំណើពីប្រធានគណបក្សដែលមានអាសនៈច្រើនជាងគេនៅក្នុងរដ្ឋសភា ដើម្បីបញ្ចេញព្រះរាជក្រឹត្យតែងតាំងនាយករដ្ឋមន្ត្រីថ្មី គឺបណ្ឌិត ហ៊ុន ម៉ាណែត។ បន្តមកទៀតនាយករដ្ឋមន្ត្រីថ្មីនឹងរៀបចំគូផ្គង់រដ្ឋាភិបាលក្នុងគណរដ្ឋមន្ត្រី ដើម្បីផ្ដល់សេចក្ដីទុកចិត្តពីរដ្ឋសភា។
លោកបន្តថា៖ «នៅថ្ងៃចន្ទ ទី៧ ខែសីហា សម្រាប់ការតែងតាំងនាយករដ្ឋមន្ត្រី ដើម្បីឱ្យនាយករដ្ឋមន្ត្រីថ្មីមានឱកាសគ្រប់គ្រាន់រៀបចំសមាភាពរដ្ឋាភិបាល»។
លោក ហ៊ុន សែន អះអាងថា ក្រោយលោកលាលែងពីតំណែងនាយករដ្ឋមន្ត្រី លោកនឹងកាន់តួនាទីជាប្រធានបក្សប្រជាជនកម្ពុជា ជាសមាជិករដ្ឋសភា និងជាប្រធានឧត្តមក្រុមប្រឹក្សាព្រះមហាក្សត្រ ព្រមទាំងជាប្រធានព្រឹទ្ធសភាជំនួសលោក សាយ ឈុំ។
លោកបានមានប្រសាសន៍ថា៖ «ខ្ញុំនៅតែមានលទ្ធភាព ដើម្បីបន្តបម្រើប្រជាពលរដ្ឋនិងជួយរាជរដ្ឋាភិបាលក្នុងការគ្រប់គ្រងសន្តិសុខ សណ្ដាប់ធ្នាប់ ក៏ដូចជាចូលរួមចំណែកអភិវឌ្ឍប្រទេសជាតិជាបន្តទៀត»។
លោក ហ៊ុន សែន បានបញ្ជាក់បន្ថែមថា ការលាលែងពីនាយករដ្ឋមន្ត្រី ជាការលះបង់មួយដ៏ធំ ប៉ុន្តែការលះបង់នេះមានតម្លៃ ដើម្បីធានាសេចក្ដីសុខសាន្តរបស់ប្រជាជន។ លោកបានយកករណីដែលលោកលាលែងពីនាយករដ្ឋមន្ត្រីទៅប្រៀបធៀបនឹងអតីតព្រះមហាក្សត្រ នរោត្តម សីហនុ ដែលបានដាក់រាជ្យឱ្យព្រះមហាក្សត្រ នរោត្តម សីហមុនី។
លោក សិង្ហ គីរី អ្នកនាំពាក្យគណបក្សខ្មែររួបរួមជាតិ យល់ឃើញថា មិនជាបញ្ហានេះទេ ប្រសិនបើមានការឯកភាពគ្នារបស់គណបក្សដែលឈ្នះឆ្នោត។
លោកមិនទាន់ហ៊ានអះអាងថា នាយករដ្ឋមន្ត្រីថ្មីបើកលំហនយោបាយក្នុងកម្រិតណានៅឡើយទេ ប៉ុន្តែនាយករដ្ឋមន្ត្រីថ្មីមិនជាបញ្ហានេះ ព្រោះមាននាយករដ្ឋមន្ត្រីចាស់នៅចាំជួយជ្រោមជ្រែងពីខាងក្រោយ។
លោកយល់ឃើញថា៖ «ប្រហែលជាមិនមានប្រែប្រួលអ្វីថ្មីទេ»។
លោកបានបន្តថា៖ «គោលបំណងដែលប្រជារាស្ត្រយើងចង់បាន គឺការទប់ស្កាត់ជនជាតិបរទេស ជាពិសេសជនជាតិវៀតណាមហូរចូលមកកម្ពុជា។ ដូច្នេះយើងត្រូវរឹបន្តឹងតាមព្រំដែន ហើយប្រសិនបើជនបរទេសចូលមកក្នុងប្រទេសត្រូវតាមច្បាប់»។
លោកប្រាប់ឱ្យរងចាំមើលការដឹកនាំរបស់នាយករដ្ឋមន្ត្រីថ្មីទាំងអស់គ្នា តើដូចនាយករដ្ឋមន្ត្រីចាស់ ឬក៏មានការប្រែប្រួលអ្វីខ្លះ?
ចំណែកអ្នកនាំពាក្យគណបក្សភ្លើងទៀន លោក គឹមសួរ ភារិទ្ធ បានលើកឡើងថា ការណ៍ដែលលោក ហ៊ុន សែន នឹងប្រកាសលាលែងពីនាយករដ្ឋមន្ត្រី គឺជាសិទ្ធិគណបក្សនយោបាយរបស់គេ។
លោកសង្ឃឹមថា នាយករដ្ឋមន្ត្រីថ្មីដែលកើតចេញពីការបោះឆ្នោតក្នុងអាណត្តិថ្មីនេះ នឹងមានការប្រែប្រួលក្នុងការដឹកនាំប្រទេសកាន់តែល្អប្រសើរទាំងផ្នែកសេដ្ឋកិច្ច ការទូត ក៏ដូចជាផ្នែកនយោបាយ និងលើកស្ទួយប្រជាធិបតេយ្យកាន់តែប្រសើរជាងមុន។
លោកក៏សង្ឃឹមផងដែរថា រដ្ឋាភិបាលថ្មីនឹងបើកលំហរសេរីភាពនយោបាយចំពោះគណបក្សប្រឆាំង ទោះលំហរនយោបាយបើកធំ ឬតូចចង្អៀតយ៉ាងណា គឺអាស្រ័យលើស្ថានភាពជាក់ស្ដែង ពីព្រោះអីកម្ពុជារស់នៅក្នុងពិភពលោក។
លោកបាននិយាយថា៖ «យើងនឹងព្យាយាមធ្វើកិច្ចការជាមួយនឹងថ្នាក់ដឹកនាំថ្មី ដើម្បីដោះស្រាយបញ្ហាឱ្យឆ្លើយតបនឹងបរិបទនយោបាយប្រជាធិបតេយ្យស្រុកយើង»។
លោក យង់ ពៅ អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជា បានលើកឡើងថា ចាប់ពីថ្ងៃទី២២ ខែសីហា ឆ្នាំ២០២៣ គឺលោក ហ៊ុន ម៉ាណែត ជានាយករដ្ឋមន្ត្រី។ នេះជាអ្វីដែលគណបក្សប្រជាជនកម្ពុជាបានរៀបចំទុកជាមុននូវការបន្តវេននយោបាយប្រកបដោយនិរន្តរភាព ដែលកន្លងមកការបន្តវេនបែបនេះមិនដែលមាន។
លោកបានបង្ហាញចំណាប់អារម្មណ៍ថា លោក ហ៊ុន ម៉ាណែត ត្រូវបានជ្រើសរើសជាបេក្ខជនជានាយករដ្ឋមន្ត្រីបន្តវេនរបស់គណបក្សប្រជាជនកម្ពុជា។ ក្រៅពីការជ្រើសតាំងក្នុងបក្ស លោកបានឆ្លងកាត់ការបោះឆ្នោតថ្នាក់ជាតិដែលមានប្រជាជនគាំទ្ររហូតដល់ជាង៨២ភាគរយ។ ជាមួយនឹងគ្នានេះ ព្រះមហាក្សត្រគាំទ្រចំពោះការរៀនចំរបស់គណបក្សប្រជាជនកម្ពុជាក្រោយពេលលោកនាយករដ្ឋមន្ត្រី ហ៊ុន សែន បានចូលគល់ព្រះមហាក្សត្រ។
លោកបន្តថា នៅសល់តែការបោះឆ្នោតពីរដ្ឋសភាក្រោយពេលដែលគណៈកម្មាធិការជាតិរៀបចំការបោះឆ្នោតប្រកាសជាផ្លូវការនៃលទ្ធផលការបោះឆ្នោត ហើយនៅថ្ងៃទី៧ ខែសីហា ព្រះមហាក្សត្រនឹងចេញព្រះរាជក្រឹត្យតែងតាំងនាយករដ្ឋមន្ត្រី ដើម្បីរៀបចំគណរដ្ឋមន្ត្រីយកទៅឆ្លងសភា។ ដូច្នេះនៅតែចំណុចនេះមួយទៀតប៉ុណ្ណោះ ដែលលោក ហ៊ុន ម៉ាណែត ចូលខ្លួនមកដឹកនាំរដ្ឋាភិបាលចាប់ពីថ្ងៃទី២២ ខែសីហា ឆ្នាំ២០២៣។
លោកបានលើកឡើងថា ចំណុចចម្បងមួយ គឺលោក ហ៊ុន សែន បានធ្វើនាយករដ្ឋមន្ត្រីប្រមាជាង៣៨ឆ្នាំ ពោលគឺចាប់តាំងពីលោកធ្វើជានាយករដ្ឋមន្ត្រីរហូតមកដល់ថ្ងៃទី២២ ខែសីហា ឆ្នាំ២០២៣។ ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន ត្រូវបានគេកត់សម្គាល់ឃើញសមទ្ធិផលធំៗជាច្រើន ដើម្បីឱ្យប្រជាជាតិកម្ពុជាចងចាំ គឺលោក ហ៊ុន សែន ជាឥស្សរជននយោបាយដែលមិនរត់ចោលសមរភូមិនិងមិនរត់ចោលកម្ពុជា។
លោកបន្តថា លោកនាយករដ្ឋមន្ត្រី ហ៊ុន សែន បានដឹកនាំនាវាកម្ពុជាចាប់តាំងពីការដួលរំលំរបបកម្ពុជាប្រជាធិបតេយ្យរបស់ខ្មែរក្រហម និងការកសាងប្រទេសក្នុងស្ថានភាពដ៏លំបាកស្របពេលដែលពិភពលោកស្ថិតក្នុងសមរភូមិសង្គ្រាមត្រជាក់ ខណៈកម្ពុជាបានរងការខ្ទេចខ្ទាំអស់នូវរចនាសម្ព័ន្ធ។
លោកបន្ថែមថា៖ «ចំណុចដ៏សំខាន់មួយទៀតបានកសាងសន្តិភាពដំណើរឆ្ពោះទៅរកសន្តិភាពសម្រាប់កម្ពុជា គឺ ការចរចាស្វែងសន្តិភាពក្នុងឆ្នាំ១៩៨៧ រហូតសម្រេចបានកិច្ចព្រមព្រៀងក្រុងប៉ារីសនៅឆ្នាំ១៩៩១ ហើយបានបោះឆ្នោតដំបូងក្នុងឆ្នាំ១៩៩៣ ដែលរៀបចំដោយអ៊ុនតាក់»។
លោកបន្ថែមទៀតថា៖ «នៅពេលបានសន្ដិភាពហើយ គឺការការពារសន្តិភាពរហូតទទួលបានសន្តិភាពពេញលេញចាប់ពីដួលរំលំទាំងស្រុងនៃរបបខ្មែរក្រហមនៅឆ្នាំ១៩៩៨។ នេះជាការឯកភាពទឹកដីពេញលេញរបស់កម្ពុជា ហើយនិងបន្តអភិវឌ្ឍប្រទេសកម្ពុជា»។
ជាមួយនឹងគ្នាកម្ពុជាបានបើកទូលាយដល់អង្គការក្នុងតំបត់និងពិភពលោក ដែលកន្លងមកកម្ពុជាធ្លាប់តែជាប្រទេសទទួលជំនួយពីបរទេសក្លាយជាប្រទេសផ្ដល់ជំនួយដល់ប្រទេសដទៃវិញ។
លោកបាននិយាយថា ទោះក្នុងអាណត្តិទី៧នេះ មានរបៀបធ្វើការថ្មីក៏ដោយ ក៏បន្ទាត់នយោបាយនៅតែជារបស់គណបក្សប្រជាជនកម្ពុជាដដែល។ មានន័យថា លោក ហ៊ុន ម៉ាណែត ដឹកនាំក្នុងសម័យកាលដែលប្រទេសមានសុខសន្តិភាព និងមានការអភិវឌ្ឍរួចទៅហើយ។ អាចនិយាយបានថា លោកទទួលមរតនយោបាយរឹងមាំពីអ្នកជំនាន់មុន។ ដូច្នេះមិនពិបាកដូចអ្នកជំនាន់មុនដែលចាប់ផ្ដើមពីអ្វីៗសុទ្ធតែទន់ជ្រាយ។ ប៉ុន្តែភាពរឹងមានអ្នកជំនាន់ថ្មីមិនប្រាកដថាការដឹកនាំកាន់តែអភិវឌ្ឍទេ ប្រសិនបើការដឹកនាំនោះមិនល្អ។
លោកបញ្ជាក់ថា៖ «គណរដ្ឋមន្ត្រីថ្មីរបស់លោក ហ៊ុន ម៉ាណែត គឺជាថាមពលថ្មីនៃគណរដ្ឋមន្ត្រីដែលនៅលើពិភពលោកកម្រនឹងឃើញការផ្លាស់ប្ដូរគណរដ្ឋមន្ត្រី។ នេះបើតាមការគូផ្គង់គណរដ្ឋមន្ត្រីដែលជាមនុស្សជំនាន់ថ្មីទាំងអស់ ប៉ុន្តែពួកគេត្រូវការបន្ទាត់នយោបាយច្បាស់លាស់»៕
No comments:
Post a Comment