រឿងនិទានពីកិន្នរ

កាលពីព្រេងនាយនៅភ្នំហិមពាន្តមានស្ដេចកិន្នរបានរស់នៅនគរជាមួយប្រពន្ធកូន។ ពួកគេរស់នៅទីនោះយ៉ាងសុខសាន្ត ប៉ុន្តែថ្ងៃមួយនគរស្ដេចកិន្នរបានវាយប្រហារដោយព្យុះព្រឹល ហើយអូសបន្លាយអស់រយៈពេលជាច្រើនឆ្នាំ។ ពួកគេព្យាយាមបន្ស៊ាំខ្លួនរស់នៅជាមួយព្យុះព្រឹល។ ពេលពួកគេសម្របខ្លួនជាមួយព្យុះព្រឹល ក៏មានពួកកិន្នរផ្សេងទៀតលើកទ័ពធ្វើសង្គ្រាមដណ្ដើមអំណាចពីស្ដេចកិន្នរ។ ដោយមិនអាចទប់ទល់នឹងស្ថានការណ៍ដ៏អាក្រក់ដែលកើតឡើងផ្ទួនៗគ្នា ស្ដេចកិន្នរក៏សម្រេចនាំប្រពន្ធកូនចាកចេញពីនគរ ហើយទៅស្នាក់អាស្រ័យបណ្ដោះអាសន្នក្បែរអាណាចក្រមនុស្ស។ នៅអាណាចក្រជាមួយមនុស្ស ស្ដេចកិន្នរនិងប្រពន្ធកូនរស់នៅដោយលាក់បំពួន ដ្បិតខ្លាចមនុស្សយាយីពួកគេ។ 

 

ស្ដេចកិន្នរមានបុត្រាបុត្រីប្រាំពីរនាក់ ប៉ុន្តែពួកគេនៅមានតូចៗនៅឡើយ។ ក្នុងចំណោមពួកគេមានកូនច្បងនិងបន្ទាប់ប៉ុណ្ណោះ ដែលស្ដេចកិន្នរតែងតែនាំទៅជាមួយ ដើម្បីស្វែងរកអាហារ។ ពួកគេបានហោះហើរមកដល់កន្លែងមនុស្សម្នាប្រកបកិច្ចការងារចិញ្ចឹមជីវិតផ្សេងគ្នាយ៉ាងអ៊ូរអរ។ ស្ដេចកិន្នរនិងកូនទាំងពីរបានកាឡាខ្លួនជាមនុស្សធម្មតា ហើយបន្លំខ្លួនជាមួយហ្វូងមនុស្ស។ ពេលយូរៗទៅកូនទាំងពីររបស់ស្ដេចកិន្នរបានស្នើបិតារៀនសូត្រវិជ្ជាផ្សេងៗជាមួយនឹងកូនអ្នកស្រុកដោយពួកគេសន្យាថា មិនឱ្យមនុស្សដឹងពីសមាភាពពួកគេជាកិន្នរឡើយ។

 

តាំងពីពេលនោះមក ទាំងពីរនាក់បងប្អូនបានព្យាយាមលាក់យ៉ាងណាមិនឱ្យមនុស្សដឹងថាពួកគេជាកិន្នរឡើយ។ ថ្ងៃមួយពេលពួកគេកំពុងតែរៀនសូត្រស្រាប់តែមានហេតុដ៏អស្ចារ្យមួយកើតឡើង។ វាជាព្យុះកំណាចដ៏ធំមួយដែលបានបោះបោកមកលើទីតាំងដែលពួកគេរៀនសូត្រនោះ។ មនុស្សម្នាបានលាក់ខ្លួន។

 

ព្យុះស្ងប់មួយសន្ទុះស្រាប់តែរន្ទះបាញ់លើដីបង្កើតបានជាកូនរណ្ដៅ ប៉ុន្តែផ្លេកបន្ទោរព្រាកៗឥតដាច់ពីអាកាសតភ្ជាប់មកកូនរណ្ដៅនោះ កិន្នរប្អូនដែលមានសេចក្ដីអង់អាចនិងចង់ដឹងពីអ្វីដែលថ្មី កាលបើឃើញដូចនោះក៏ដើរចូលទៅអើតមើលរណ្ដៅ រីឯមនុស្សដែលពួកលាក់ខ្លួនពីព្យុះក្បែរនោះចេញមកមើលយ៉ាងព្រោងព្រាត។ កិន្នរជាបងឃើញហេតុមិនស្រួល ក៏ចូលទៅហាមឃាត់ប្អូន តែប្អូនមិនស្ដាប់បង្គាប់ ក៏កើតជារឿងឈ្លោះទាល់ទែងគ្នាមួយរំពេក។ ដោយអត់ទ្រាំមិនបាន កិន្នរបងបានបាក់មែកឈើធ្វើរំពាត់វាយប្អូនយ៉ាងចាស់ដៃរហូតប្រែរូបរាងជាកិន្នរ។ មនុស្សដែលកំពុងឈរចោមរោមពេលឃើញដូច្នោះ ក៏ចូលចាប់ឃាត់ខ្លួនពួកគេ តែកិន្នរច្បងដឹងខ្លួនមុន ក៏ហើររត់គេចខ្លួនចោលប្អូន។ 

 

ចំណែកស្ដេចកិន្នរជាបិតាពេលបានទទួលដំណើរនេះហើយ ក៏ហោះហើរមកជួយកូន តែពេលមកដល់មិនឃើញកូនទាំងពីរទេ ព្រោះកិន្នរប្អូនត្រូវមនុស្សចាប់យកចេញទៅបាត់ រីឯកិន្នរច្បងក៏មិនដឹងហើរទៅដល់ទីណា។ ស្ដេចកិន្នរព្យាយាមស្វះស្វែងរកដំណឹងកូនទាំងពីរយ៉ាងយូរ តែនៅតែមិនឃើញ។ ស្ដេចកិន្នរអស់កម្លាំងរហិតរហៃខ្លួនប្រាណស្លាបហើរទៅមុខលែងរួច ក៏ធ្លាក់សន្លប់លែងកម្រើកខ្លួន។

 

រឿងនេះដកស្រង់ពីសៀវភៅព្រេងនិទានរបស់តាខ្ញុំ