គួរចាប់ផ្តើមអាជីវកម្មបែបណាទើបមានឥទ្ធិពលលើទីផ្សារ?
អត្ថបទ៖ តន វិបុល
ក្នុងនាមជាអ្នកគ្រប់គ្រងអាជីវកម្មឆ្នើមមួយរូបរបស់កម្ពុជា ឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិនៃក្រុមហ៊ុនម៉េងលី ជេ. គួច គ្រុប ធ្លាប់មានប្រសាសន៍ថា ការបង្កើតក្រុមហ៊ុនគឺជារឿងមួយលំបាក ឯការរក្សាស្ថិរភាពក្រុមហ៊ុនឱ្យមានចីរភាពជារឿងមួយកាន់តែលំបាកទៅទៀត។ អ្នកប្រកបអាជីវកម្មដែលអាចឈរជើងបានយូរអង្វែង និងបន្តការរីកចម្រើនធំធាត់ទៅមុខបាននោះ ពុំមែនជារឿងងាយស្រួលនោះទេ ហើយវាកាន់តែពិបាកសម្រាប់សហគ្រិនទើបតែប្រលូកក្នុងវិស័យជំនួញដែលពុំសូវមានចំណេះដឹង និងពិសោធជាដើម តែក៏ពុំអាចសន្និដ្ឋានថា ពួកគេមិនអាចធ្វើអាជីវកម្មបាននោះដែរ។ ធុរជនឆ្នើមរូបនេះបន្តផ្តល់អនុសាសន៍ថា ដើម្បីធ្វើឱ្យអាជីវកម្មមានឥទ្ធិពលលើទីផ្សារ ឈរជើងបានយូរ និងបន្តការរីកចម្រើន គួរសិក្សាទៅលើកត្តាសំខាន់ៗយ៉ាងហោចណាស់៧ចំណុចដែរ។
ការចាប់ផ្តើមអាជីវកម្មនីមួយៗមិនមែនកើតឡើងដោយចៃដន្យនោះទេ ភាគច្រើនការធ្វើអាជីវកម្មត្រូវតែចាប់ផ្តើមជាមួយនឹងផែនការច្បាស់លាស់ ទើបទទួលបានលទ្ធិផលជោគជ័យ។ ដើម្បីឱ្យអាជីវកម្មមួយជោគជ័យទៅបាន អ្នកត្រូវតែមានគម្រោងច្បាស់លាស់ និងលម្អិតបំផុត ព្រោះថាការធ្វើអាជីវកម្ម គឺត្រូវតែសិក្សាគ្រប់ជ្រុងជ្រោយបំផុតទៅលើតាំងធ្វើអាជីវកម្មល្អ ជំនាញ (ជំនាញរឹង១៥% ជំនាញទន់៨៥%) ការគ្រប់គ្រងធនធានមនុស្សនិងប្រព័ន្ធហិរញ្ញវត្ថុត្រឹមត្រូវ ទំនាក់ទំនងសាធារណៈ(អតិថិជនគោលដៅ) តម្រូវការ ដៃគូប្រកួតប្រជែង និងស្ថិរភាពនយោបាយជាដើម។ អ្នកចាប់ផ្តើមអាជីវកម្មគួរសម្លឹងមើលអាជីវកម្មណាដែលថ្មីហើយប្លែក តែមិនគួរសម្លឹងមើលប្រភេទអាជីវកម្មដែលគេកំពុងជោគជ័យភ្លូកទឹកភ្លូកដីរួចហើយនោះទេ។
អ្វីដែលអ្នកប្រកបអាជីវកម្មត្រូវធ្វើដំបូងដោយមិនអាចនៅស្ងៀមមួយកន្លែងបាននោះ គឺត្រូវសិក្សាទីតាំងនិងតម្រូការទីផ្សារ។ និយាយពីសេវាកម្មដែលយើងផ្គត់ផ្គង់មានតម្រូវការប៉ុនណា? ប្រសិនជាសិក្សាទៅឃើញថា ទីផ្សារកំពុងតែមានតម្រូវការខ្ពស់ នោះជាឱកាសដែលអ្នកគួរតែបើកព្រមទាំងអាចពង្រីកការផ្គត់ផ្គង់បានបន្ថែមទៀត។ ទន្ទឹមនឹងនោះ អ្នកក៏មិនគួរភ្លេចដោយមើលរំលងពីការរក្សាគុណភាពនោះដែរ ព្រោះថាការរក្សាគុណភាព ជាកត្តាចាំបាច់បំផុតដែលអ្នកត្រូវតែយកចិត្តទុកដាក់ធ្វើឱ្យបានល្អ។ ការធ្វើយ៉ាងនេះគឺដើម្បីពង្រឹងក្រុមហ៊ុនឱ្យរឹតតែរឹងមាំ។ ចំណែកទីតាំងក៏ជាកត្តាសំខាន់ខ្លាំងមួយដែរ ម្ចាស់អាជីវកម្មត្រូវសិក្សាពីតំបន់ដែលខ្លួនផ្តល់សេវាកម្មនោះអាចមានកំណើនតម្រូវការរបស់អតិថិជនច្រើនទេ។ ការសិក្សារកទីតាំងថ្មីដើម្បីពង្រីកវិសាលភាពអាជីវកម្មរបស់ខ្លួន ទៅតាមទីផ្សារដែលកំពុងតែខ្វះខាតគឺជារឿងល្អ។ ក៏ប៉ុន្តែ ម្ចាស់អាជីវកម្មក៏ត្រូវដឹងដែរថា តើការសិក្សាទីតាំងនោះផ្តោតសំខាន់ទៅលើបរិមាណឬមួយគុណភាព? ប្រសិនបើជាបរិមាណគួរតែជ្រើសរើសទីតាំងណាដែលមិនសូវមានថាមពលចំណាយ តែស្រូបអត្ថប្រយោជន៍បានច្រើន។
ចំណុចសំខាន់មួយទៀត គឺការគ្រប់គ្រងហិរញ្ញវត្ថុ។ មុននឹងធ្វើអាជីវកម្ម តើហិរញ្ញវត្ថុមានគ្រប់គ្រាន់ហើយឬនៅ សម្រាប់ការទប់ទល់ទៅនឹងហានិភ័យនិងការពង្រីកវិសាលភាពអាជីវកម្មរបស់ខ្លួន? ប្រសិនបើមិនទាន់មានគ្រប់គ្រាន់ទេ ម្ចាស់អាជីវកម្មត្រូវមានសិល្បៈទំនាក់ទំនងល្អ ដើម្បីកៀរគរហិរញ្ញវត្ថុបន្ថែមក្នុងការពង្រីកសក្តានុពលអាជីវកម្មរបស់ខ្លួនឱ្យកាន់តែរីកធំធាត់ឡើង។
ទន្ទឹមនឹងការគ្រប់គ្រងហិរញ្ញវត្ថុ ការគ្រប់គ្រងធនធានមនុស្សក៏ជារឿងមិនអាចខ្វះបានដែរ ព្រោះអាជីវកម្មអាចដួលរលំឬជោគជ័យ គឺអាស្រ័យលើការគ្រប់គ្រងធនធានមនុស្សនេះហើយ។ ម្ចាស់អាជីវកម្មដែលជោគជ័យឱ្យតម្លៃលើបុគ្គលិកខ្លាំង សហគ្រិនទាំងនោះពុំដែលចាត់ទុកបុគ្គលិកជាខ្ញុំបម្រើនោះឡើយ។ អ្នកផ្តល់តម្លៃដល់បុគ្គលិកត្រឹមជាខ្ញុំបម្រើមិនខ្វល់ មិនគិតគូរពីប្រាក់បៀវត្សសមរម្យ ឬក៏ដេញចេញពេលណាក៏បាន នោះអាជីវកម្មរបស់អ្នកនឹងមិនអាចឈរជើងបានយូរអង្វែងឡើយ។ ផ្ទុយទៅវិញ បើអ្នកចាត់ទុកបុគ្គលិកជាកវែកកឆ្នាំង ជាអ្នកជំនួញ និងផ្តល់ចំណេះដឹងការងារដល់ពួកគេ នោះពួកគេនឹងខិតខំធ្វើការអស់ពីសមត្ថភាពដែលខ្លួនមានយ៉ាងប្រាកដ។ លើសពីនេះទៅទៀត ម្ចាស់ក្រុមហ៊ុនត្រូវជ្រើសរើសបុគ្គលិកណាដែលមានចំណេះដឹង មានជំនាញ និងមានក្រមសីលធម៌ខ្ពស់ ដោយចៀសវាងការជ្រើសរើសបុគ្គលិកតាមរយៈបក្សពួកនិយម។ ការផ្តល់អត្ថប្រយោជន៍បន្ថែមជូនដល់បុគ្គលិក ក៏ជាកត្តាសំខាន់ផងដែរ។ ការផ្តល់អត្ថប្រយោជន៍បន្ថែមគឺដើម្បីជាការលើកទឹកចិត្តដែលពួកគេខិតខំប្រឹងប្រែង ក្រុមហ៊ុនក៏លូតលាស់ទៅតាមនោះដែរ។
ក្រៅពីចំណុចខាងលើនេះ លោក គួច ម៉េងលី ក៏បានសង្កត់ធ្ងន់ទៅលើការជម្នះបញ្ហាដោយមានដំណោះស្រាយល្អ។ ការចាប់ផ្តើមអាជីវកម្មដំបូង ម្ចាស់អាជីវកម្មជោគជ័យតែងតែជួបបញ្ហាប្រឈមស្ទើរមួយរយជំពូក ប៉ុន្តែសហគ្រិនទាំងនោះមិនបានរត់គេចពីបញ្ហា ឬក៏មិនដោះស្រាយនោះទេ។ ផ្ទុយទៅវិញ ពួកគេបែរជាជម្នះបញ្ហាដោយស្វែងរកវិធីដោះស្រាយបញ្ហារហូតជោគជ័យ ហើយបញ្ហាដែលដោះស្រាយជាប្រចាំនោះ វានឹងវិវត្តខ្លួនទៅជាទម្លាប់ ឬក៏ជាសិល្បៈដោះស្រាយបញ្ហារបស់សហគ្រិនជោគជ័យទាំងនោះ។ សូមមើលបញ្ហាឱ្យឃើញជាបញ្ហា បើសិនលោកអ្នកមិនមើលឃើញបញ្ហាជាបញ្ហាទេ នោះអ្នកនឹងមានបញ្ហាជាមិនខាន។
ចំណុចចុងក្រោយ បន្ទាប់ពីអាជីវកម្មដំណើរការទៅមុខដោយរលូនហើយ គឺជាពេលវេលាពិសេសមួយដែលម្ចាស់អាជីវកម្មត្រូវគិតគូពង្រីកសក្តានុពលរបស់ខ្លួនទៅកាន់ទីផ្សារប្រកួតប្រជែងធំៗ។ ដោយចងផលិតកម្ម មិនថាផលិតកម្មនោះជាសេវាកម្មឬផលិតផលនោះទេ គឺត្រូវចងជាប្រព័ន្ធដើម្បីការពារហានិភ័យដោយជួយជ្រោមជ្រែងគ្នាក្នុងការរក្សាលំនឹង និងបញ្ចេញឥទ្ធិពលទៅលើទីផ្សារ។ តែទោះជាយ៉ាងណាក៏ដោយ បើចង់ក្លាយជាសហគ្រិន ដែលលះបង់ធ្វើទាំងគ្មានជំនាញនិងគ្មានភាពច្បាស់លាស់ នោះមិនអាចដើរដល់គោលដៅបានឡើយ។ ដូច្នេះដើម្បីហែលឆ្លងដល់ត្រើយ និងក្លាយជាសហគ្រិនមួយរូបនោះ អ្នកចាំបាច់ត្រូវតែខិតខំរៀនសូត្រឱ្យបានច្បាស់លាស់ ហើយចាប់ជំនាញឱ្យបានត្រឹមត្រូវ និងធ្វើការងារដើម្បីឆក់យកបទពិសោធឱ្យបានឆ្អិនឆ្អៅសិន សឹមឈោងចាប់ក្ដីសុបិនជាសហគ្រិន នោះនឹងបានជោគជ័យ៕
No comments:
Post a Comment