កូនខ្ញុំចិត្តបាន

 

កូនខ្ញុំកាត់ដីខ្មែរដូនតា
សែសិបហិកតាសង់ភូមិឋាន
ជូនយួនរស់នៅល្អថ្កើងថ្កាន
មានផ្ទះសុខសាន្តសន្ដានយួន។

កូនខ្ញុំជំនាញមានជិតឆ្ងាយ
ចេញមកបកស្រាយដោយសំនួន
ថាកាត់ដីខ្មែរសង់ផ្ទះយួន
មិនមែនជាក្បួនក្បត់ជាតិទេ។

វាស្រែកសម្អាងយ៉ាងពីរោះ
មិនអាចរងគ្រោះដីខ្មែរកេរ
ការធ្វើនេះជួយជាតិទាំងទ្វេ
មិត្តភាពយើងគេរឹតរឹងមាំ។

ចំណែករាស្ត្រឯងថ្លែងទុក្ខភ័យ
គេដេញយកដីខំប្រឹងទ្រាំ
ទឹកភ្នែករហាមស្នាមគ្រាគ្រាំ
ពេលដែលសួរនាំវាចោទថា។

រាស្ត្ររស់នៅមិនត្រូវច្បាប់
ឮហើយស្ទើរស្លាប់ណែនឱរា
បើមិនដូច្នោះទឹកនេត្រា
ហូរក្រោមលេសថាអភិវឌ្ឍ។