វិធីសាស្រ្តរៀនសតវត្សទី២១ របស់វិទ្យាស្ថាន អន្តរទ្វីប អាមេរិកាំង
អត្ថបទ៖ តន វិបុល
ថ្មីៗនេះ វិទ្យាស្ថាន អន្តរទ្វីប អាមេរិកាំង បានពាំនាំវិធីសាស្រ្តរៀនភាសាអង់គ្លេសតាមបែបបច្ចេកវិទ្យា ទំនើបដ៏ថ្មីសន្លាងមួយពីសហរដ្ឋអាមេរិក ដើម្បីផ្តល់ភាពងាយស្រួលដល់សិស្សានុសិស្សរបស់ខ្លួនសិក្សាភាសាអង់គ្លេសឲ្យរឹងរឹតតែមានគុណភាពនោះ គឺវិធីសាស្រ្តរៀនភាសាអង់គ្លេសតាមសៀវភៅមួយប្រភេទ ដែលក្នុងនោះមានប្រព័ន្ធបច្ចេកវិទ្យាភ្ជាប់មកជាមួយស្រាប់ ពោលគឺសិក្សាតាមបែបប្រព័ន្ធអនឡាញ (Online) ដូចគ្នាទៅនឹងបណ្តាប្រទេសមួយចំនួនលើសកលលោកដែរ។ ក៏ប៉ុន្តែប្រព័ន្ធសិក្សាបែបនេះ នៅតាមស្ថាប័នអប់រំមួយចំនួនក្នុងព្រះរាជាណាកម្ពុជា ប្រហែលទំនងជាពុំទាន់មានសកម្មភាពផុសផុលច្រើននៅឡើយទេ។
ជុំវិញបញ្ហាប្រព័ន្ធរៀនភាសាអង់គ្លេសតាមបែបបច្ចេកទេសថ្មីនេះ លោក ឡុង ពិសី នាយករងវិទ្យាស្ថាន អន្តរទ្វីប អាមេរិកាំង បានថ្លែងប្រាប់សារព័ត៌មាន ឌិ អ៊ីនធ័រខន រ៉ូស្ទ័រ នៅព្រឹកថ្ងៃអង្គារនេះថា ក្នុងសតវត្សទី២១នេះ ជាសម័យដែលបច្ចេកវិទ្យាកាន់តែរីកសុសសាយស្ទើរគ្រប់កន្លែង និងពាសពេញពិភពលោក។ ដោយមើលឃើញពីភាពរីកចម្រើននៃបច្ចេកវិទ្យា និងចង់បោះជំហានឲ្យទាន់សម័យកាល វិទ្យាស្ថាន អន្តរទ្វីប អាមេរិកាំង បានជ្រើសរើសយកវិធីសាស្រ្តរៀនភាសាអង់គ្លេសតាមបែបប្រព័ន្ធបច្ចេកវិទ្យានេះ ក៏ព្រោះចង់ផ្តល់ភាពងាយស្រួលដល់ការរៀនសូត្ររបស់សិស្សនុសិស្ស ដោយមិនចាំបាច់មានសៀវភៅលំហាត់ ឬក៏សៀវភៅកិច្ចផ្ទះនោះទេ។
បើទោះជាបែបនេះក្តី ក៏នៅតែទាមទារឲ្យសិស្សចេះប្រើប្រាស់អ៊ីធ័រណែតដែរ ប៉ុន្តែនាយករងរូបនេះបានលើកឡើងថា ចំណុចនេះមិនមែនជាបញ្ហាចោទដល់សិស្សានុសិស្សសម័យនេះនោះទេ ព្រោះសព្វថ្ងៃមិនថាយុវជន ឬកុមារឡើយ ភាគច្រើនពួកគេសុទ្ធសឹងតែប្រើប្រាស់ប្រព័ន្ធអ៊ីធ័រណែតស្ទើរគ្រប់ៗគ្នាទៅហើយតាមរយៈស្មាតហ្វូន អាយផែត និងកុំព្យូទ័រជាដើម។ លោកបន្ថែមថា វាហាក់គ្មានអ្វីពិបាកដល់ពួកគេទេ គ្រាន់តែវាយលេខសម្ងាត់ចូលក្នុងគណនីពួកគេសុទ្ធតែអាចរៀន និងធ្វើកិច្ចការដែលលោកគ្រូអ្នកគ្រូដាក់ឲ្យធ្វើបានគ្រប់កន្លែង និងគ្រប់ពេលវេលាទាំងអស់ មិនថានៅទីណានោះឡើយ។ ទន្ទឹមនឹងគ្នានេះ វិទ្យាស្ថានអប់រំជាភាសាបរទេសមួយនេះ ក៏បានបំពាក់នូវកុំព្យូទ័រទំនើបៗតាមបន្ទប់ និងកន្លែងសំខាន់ៗមួយចំនួននៃអគារសិក្សារបស់ខ្លួន ដើម្បីឲ្យសិស្សបានអនុវត្តមេរៀន ព្រមទាំងកិច្ចការដែលទាក់ទងនឹងមេរៀនទាំងឡាយបានដោយសេរីផងដែរ។
គួរជម្រាបជូនថា ការសិក្សាតាមប្រព័ន្ធអនឡាញមិនត្រឹមតែជាបច្ច័យបង្កឲ្យមានភាពរឹងរឹតតែងាយស្រួលសិក្សារៀនសូត្ររបស់សិស្សានុសិស្សនាពេលបច្ចុប្បន្នប៉ុណ្ណោះទេ ម្យ៉ាងវាថែមទាំងផ្តល់អត្ថប្រយោជន៍ច្រើនដល់ការបង្រៀនរបស់លោកគ្រូអ្នកគ្រូផងដែរ។ ពិសេសនោះ គឺការដាក់កិច្ចការឲ្យសិស្សអនុវត្ត ឬកិច្ចការប្រឡងជាដើម។ តាមរយៈផលប្រយោជន៍ដែលទទួលបានពីវិធីសាស្រ្តរៀនតាមប្រព័ន្ធអនឡាញនេះ លោក ឡុង ពិសី សង្ឃឹមថា អ្នកសិក្សាគ្រប់មជ្ឈដ្ឋានក្នុងសតវត្សនេះ នឹងចាប់អារម្មណ៍ពីវិធីសាស្រ្តរៀនបែបទំនើបដែលវិទ្យាស្ថាន អន្តរទ្វីប អាមេរិកាំង បានពាំនាំមកនាពេលនេះ។ តែទោះជាយ៉ាងណាក៏ដោយ សម្រាប់អ្នកចង់ផ្លាស់ប្តូរបរិបទសិក្សា ក៏ដូចជាចង់ភ្លក់រសជាតិថ្មីនៃការសិក្សាតាមបែបប្រព័ន្ធអនឡាញ ក៏គួរតែផ្តល់ឱកាសឲ្យខ្លួនឯងបានសាកល្បង ដើម្បីទទួលយកបទពិសោធថ្មីតាមបែបផែន ដូចអរិយប្រទេសមួយចំនួនលើសកលលោក៕
No comments:
Post a Comment