អនិច្ចាស្រូវថោក_សំណោកអ្នកស្រែ
ស្រូវអង្ករខ្មែរថោកហួសថ្លែង
អ្នកស្រែចំបែងរែងខ្វាយខ្វល់
ខ្ចីប្រាក់គេបង្កើតភោគផល
សង្ឃឹមស្រូវផ្ដល់ដោះសង់គេ។
ពេលប្រមូលផលកល់ទឹកភ្នែក
អ្នកខ្លះទួញស្រែកមិនសមទេ
ហេតុម្ដេចក៏ស្រូវថោករឹតទ្វេ
ឈ្មួញយើងឈ្មួញគេបន្ថោកទិញ។
ឈ្មួញយកទៅលក់នៅអឺរ៉ុប
គេអរខិបខុបបានថ្លៃពេញ
អឺរ៉ុបសរសើរឥតទោរម្នេញ
អ្នកស្រែយើងវិញដេកកើតទុក្ខ។
គ្មានប្រាក់បង់សងធនាគារ
គ្រោះស្រូវកម្មពារហៀរជង្រុក
បើមិនព្រមលក់ឃាំងឃាទុក
ច្បាស់ណាស់គេលុករឹបអូសកេរ។
ដូចនេះទោះថោកមិនបានថ្លៃ
លក់យកកម្រៃទៅសង់គេ
ស្រូវមួយតៅមិនស្មើកាហ្វេ
ប្រេន (brand) របស់គេមួយកែវផង។
អនិច្ចាវាសនាអ្នកស្រែ
អ្នករស់មួយគែបានត្រឹមផ្សង
ឱ្យព្រះឥន្ទ្រជួយស្រាយចំណង
ផុតគ្រោះសៅហ្មងពីស្រូវថោក៕
ដោយ ឌីខាំញ៉ញ់ ១២ – ធ្នូ – ២០១៩
No comments:
Post a Comment