សយ ចន្ទពេញបរមី៖ សិក្ខាសាលាអាចពង្រីកចំណេះដឹង និងអភិវឌ្ឍខ្លួនបានល្អ
អត្ថបទ៖ តន វិបុល
នៅប៉ុន្មានឆ្នាំចុងក្រោយនេះ មានមនុស្សជាច្រើនបានងាកមកចាប់អារម្មណ៍នឹងការពង្រីកចំណេះដឹងថ្មីនិងអភិវឌ្ឍខ្លួនបន្ថែមតាមរយៈការចូលរួមសិក្ខាសាលា ឬសន្នីសីទស្តីពីអ្វីមួយ។ ការណ៍នេះ គឺជាដំណើរការសិក្សាក្រៅផ្លូវការមួយដែលមហាជនទូទៅសុទ្ធតែអាចចូលរួមរៀនសូត្រ ដើម្បីទទួលបាននូវចំណេះដឹង និងបទពិសោធថ្មីៗពីសំណាក់វាគ្មិនបានយ៉ាងទូលំទូលាយ។ ក្នុងនោះគេតែងឃើញមានពលរដ្ឋខ្មែរដែលជាព្រះសង្ឃ គ្រហស្ថ និងយុវជនខ្មែរដែលជាកម្លាំងស្នូលរបស់សង្គមតែងតែចូលរួមជាពិសេស។ ក្រឡេកទៅមើលពួកគេម្នាក់ៗហាក់មានភាពក្លាហានប្រកបដោយទំនុកចិត្តនិងជឿជាក់លើខ្លួនឯងណាស់។
ស្ថិតក្នុងឯកសណ្ឋានជាសិស្សសាលាឯកជនមួយ ដែលកំពុងផ្ចង់អារម្មណ៍ស្តាប់វាគ្មិនយ៉ាងយកចិត្តទុកដាក់នៅក្នុងសិក្ខាសាលាមួយស្តីពី “ហេតុអ្វីត្រូវការការសិក្សាអប់រំ” នោះគឺប្អូនស្រី សយ ចន្ទពេញបរមី។ សព្វថ្ងៃប្អូនជាសិស្សថ្នាក់ទី១១ នៃសាលារៀន អន្តរទ្វីប អាមេរិកាំង ដែលគណៈគ្រប់គ្រងសាលារៀន ព្រមទាំងលោកគ្រូអ្នកគ្រូ តែងតែបើកឱកាសទូលាយដល់រូបគេនិងសិស្សដទៃទៀតបានចូលរួមសិក្ខាសាលានេះ ក្នុងគោលបំណងបំផុសបំផុលស្មារតី និងជំរុញលើកទឹកចិត្តពួកគេស្រឡាញ់ការសិក្សារៀនសូត្របន្ថែមពីអ្វីដែលលោកគ្រូអ្នកគ្រូបានបង្ហាត់បង្រៀននៅក្នុងថ្នាក់។
និយាយដោយរួសរាយមកកាន់អ្នកសារព័ត៌មាន តែដៃកំពុងកត់ត្រាបណ្តើរ ហើយត្រចៀកផ្ទៀងស្តាប់បណ្តើរ ប្អូនស្រី ពេញបរមី យល់ថា តាមរយៈការចូលរួមសិក្ខាសាលាផ្តល់ប្រយោជន៍ច្រើនដល់មនុស្សទូទៅយ៉ាងល្អប្រសើរនិងទូលំទូលាយ ព្រោះពួកគេអាចទទួលបានចំណេះដឹង ចំណេះធ្វើ ពិសោធន៍ថ្មីៗដែលយើងអាចយកទៅអភិវឌ្ឍខ្លួនឱ្យល្អប្រសើរបាន។ ដ្បិតថា ប្អូនស្រី ចន្ទពេញបរមី រៀនមិនសូវពូកែ តែប្អូននិយាយហាក់មានទំនុកចិត្ត និងជឿជាក់លើខ្លួនឯងថា “ការសិក្សារបស់ខ្ញុំធម្មតាៗទេ តែខ្ញុំចូលចិត្តរៀន ព្រោះអនាគតខ្ញុំចង់ក្លាយជាមេធាវីល្អម្នាក់ ដែលអាចជួយការពារ និងរកយុត្តិធម៌ជូនជនរងគ្រោះពីការចោទប្រកាន់នានា”។ ពេលទំនេរ ក្រៅតែពីការសិក្សារៀនសូត្រ ប្អូនស្រីចូលចិត្តលេងកីឡាជាមួយនឹងមិត្តភក្តិ អានសៀវភៅ ឬចូលរួមសិក្ខាសាលាជាដើម។
សូមជម្រាបជូនថា ក្រៅតែពីការទទួលបានចំណេះដឹង និងបទពិសោធថ្មីៗតាមរយៈសិក្ខាសាលាក៏បានបង្កើត ភាពក្លាហាន ទំនាក់ទំនងល្អ និងចំណងមិត្តភាពជាមួយមិត្តភក្តិ និងអ្នកដទៃកាន់តែស្និតស្នាល ហើយអ្វីដែលពិសេសជាងនេះនោះ សិក្ខាសាលាអាចធ្វើឱ្យអ្នកចូលរួមយល់ដឹងទិដ្ឋភាពសង្គមជាក់ស្តែងបានច្រើនផងដែរ។ ទោះជាយ៉ាងណាក៏ដោយ ក្នុងនោះក៏មានអ្នកខ្លះបានបើកឱកាសទូលាយសម្រាប់ខ្លួនឯងបានចូលរួម តែក៏មានអ្នកដែលមិនបានផ្តល់ឱកាសសម្រាប់ខ្លួនឯងដែរ៕
No comments:
Post a Comment