សន្យាស្នេហ៍

• ធម្មជាតិផ្ដល់មក            ប៉ិចចេញពន្លក              មកជាដង្កូវ         

រូបរាងអាក្រក់                ស្លេកស្លក់ទែលម៉ូវ         មានក្លិនអាស្រូវ

                                  ស្អុយរលួយងំ។   

• ដង្កូវនេះនៅ                  ទូលទុក្ខក្ដាត់ក្ដៅ           ពីតូចដល់ធំ

ខ្លួនបាត់មេបា                ឱរាពួនយំ                   ក្នុងព្រៃជើងភ្នំ

                                  ស្រអាប់គ្រប់គ្រា។

• ពិការក្មេងវ័យ                 ភាន់ភាំភិតភ័យ           តាមកម្មវេរា

ខ្លួនខុសមេបា                 អាត្មាគ្រាំគ្រា               ឥតមានគ្នីគ្នា

                                  កំព្រាចិត្តកាយ។

• ខ្លួនមិនបរវ                   ជាប់ក្លិនមិនល្អ              គិតចេញចាកឆ្ងាយ

ស្វែងរកទីសុខ               ស្រណុកសុខកាយ       ចិត្តលែងខ្វល់ខ្វាយ

                                  យាត្រាចេញចាក។

• ត្រាច់ចរម្នាក់ឯង             ទ្រូងញ័រចំបែង             ចំប្រប់ឥតស្រាក 

ឆ្លងទីព្រៃស្ងាត់                រសាត់តោកយ៉ាក         មិនដឹងសម្រាក

                                  នៅទីឋានណា។

• លុះដល់បឹងមួយ             ខ្លួនប្រឹងបោះពួយ        ឆ្ពោះរកកូនចារ

ដែលទេររកទឹក              ចិត្តនឹកគិតថា              សម្រាកកាយា

                                  នៅលើដើមហ្នឹង។

• ឡើងមកដល់លើ            ដង្កូវមៀងមើល៍            លើផ្ទៃទឹកបឹង     

ប្រទះកូនក្អាត់                 ហែលឆ្វាត់ក្រឡឹង       ចិន្ដាចង់ដឹង

                                  ថាហ្នឹងជាអ្វី?

• មានខ្លួនតូចល្អិត             ខ្មៅដូចសំរឹទ្ធ               រលើបឥតបី

ឆ្វែលទៅឆ្វែលមក           ស្វែងរកពីស្អី               ឬរក​​​ចំណី?

                                  សូមស្ដីវាចា!!!

• ក្អាត់ឈ្មោលហារក          ឱប្អូនពន្លក                 ជ្រកក្រោមស្លឹកចា

​រូបបងមានឈ្មោះ            គ្មានយសអស្ចារ្យ         គេហៅបងថា

                                  កូនក្អាត់កូនក្អុក។

• កូនក្អាត់រៀបរាប់             ថាខ្លួនអភ័ព្វ                 ព្រាត់ចាកសម្បុក

អណ្ដូងអណ្ដែត              ត្រសែតផ្សាចុក            ឃ្លាតចាកក្ដីសុខ

                                  រស់ព្រាត់បាមេ។

• ដង្កូវថ្លែងកាត់                 ស្ដីរកកូនក្អាត់              ដោយចិត្តគ្នាន់គ្នេរ

មិនខុសពីខ្លួន                 គាប់ចួនម្ល៉េះទេ            កម្មពីបុព្វេ

                                  គ្មានអ្នកថែថួន។

• ក្អាត់ឮដូច្នេះ                  ទ្រូងតឹងស្ទើរប្រេះ         អាសូប្អូនស្ងួន

ដូចជីវិតបង                   សៅហ្មងក្នុងខ្លួន          ទម្រាំនឹមនួន

                                 ប្អូនខ្លួនជាស្រី។

• ដង្កូវញីស្ដាប់                  ពាក្យក្អាត់រាយរាប់       កើតទុក្ខជាថ្មី

ទឹកភ្នែកសោយសោក      សំណោកអប្រិយ៍         ស្រណោះខ្លួនខ្ចី

                                  ជួបគ្រោះកន្លង។

• ដង្កូវដាមដិត                  កូនក្អាត់អាណិត          ក៏ស្ដីឆ្លើយឆ្លង

សូមប្អូនសន្ដោស           បើប្រុសផ្ដោះផ្ដង           សុំស្រស់នួនល្អង

                                  ក្រងចងមូលមិត្ត។

• ដង្កូវរារេ                        កែវភ្នែកទាំងទ្វេ           រំពៃនឹកគិត

មៀងមើល​កូនក្អាត់          រសាត់មកជិត              ដែលចង់នែបនិត្យ

                                  ចងចិត្តស្នេហា។

• ក្អាត់ពោលចប់ភ្លាម          ដួងចិត្តក្រំក្រៀម          បែរប្រែស្រស់ថ្លា

វង់ភក្ដ្រញញឹម                សង្ឃឹមចិន្ដា                ជីវិតប្រាថ្នា

                                   ចិត្តចង់រស់ក្បែរ។

• នឹកគិតរួចហើយ             ដង្កូវញីឆ្លើយ               ថាប្រុសមាសស្នេហ៍

ប្អូនអរកន្លង                   បានបងសុំក្បែរ           ថ្នាក់ថ្នមមើលថែ

                                  សេពគប់ត្រាណត្រើយ។

• ខ្លួនប្អូនជាស្រី                 អារម្មណ៍ព្រួយភ័យ       ខ្លាចរៀមកតោះតើយ

រាប់អានតែមាត់              ភ្លាំងភ្លាត់កៀកកើយ      ទុក្ខច្បាស់ឥតស្បើយ    

                                  កើនលើសក្រាស់ក្រៃ។

• ក្អាត់ស្ដីវាចា                   បើកែវកនិដ្ឋា               ប្អូននៅសង្ស័យ

ងឿងឆ្ងល់ខ្លាចបង           ប៉នប៉ងចោលថ្លៃ          ដកចិត្តដោះដៃ

                                  ចោលចិត្តស្នេហា។

• រូបបងគ្មានអី                  ផ្គាប់ផ្គុនចិត្តស្រី           ក្រៅពីជីវា          

បើបងឡេះឡោះ             មិនស្មោះស្នេហា         សូមគ្រោះអសារ

                                   បង់បាត់សេរី។  

• សូមប្អូនឈប់ឆ្ងល់           ឈប់គិតខ្វាយខ្វល់       សំណល់អប្រិយ

រឿងចាស់ពីមុន              ទារុណធ្វើអ្វី                 ប្រសិនស្រស់ស្រី

                                  ប្អូនស្នេហ៍បងដែរ?                  

• ពាក្យពេចន៍ទាំងអស់       រាប់អានដោយស្មោះ     ប្រុសឥតបែកបែរ

គ្មានអ្វីបាំងបិទ                ក្នុងចិត្តមានតែ            រូបស្រស់មាសស្នេហ៍

                                  ពេញទ្រូងហរទ័យ។

• ដង្កូវនិងក្អាត់                  យល់ថ្លើមប្រមាត់         ដោយចិត្តភក្ដី                 

ទោះម្នាក់នៅលើ             ស្លឹកឈើទីទៃ              ម្នាក់នៅលើដី

                                  ជួននៅបឹងថ្លុក។

• មកដល់ពេលមួយ           ដង្កូវក្អាត់ព្រួយ            ចិត្តលែងស្រណុក

កូនក្អាត់ព្រាត់ទៅ            ដង្កូវព្រាត់សុខ             គិតសុកមមុក

                                  ដួងចិត្តចម្បែង។           

• កាលក្អាត់នៅជិត            លួងលោមនែបនិត្យ      កាយឥតតឹងតែង

ឥឡូវរែងថប់                  គ្រប់សព្វកន្លែង            កណ្ដោចកណ្ដែង

                                  ពេលដែលព្រាត់គ្នា។

• ដង្កូវក្រៀមក្រោះ             ក្អាត់ឃើញដូច្នោះ         ពោលថាពុំងា

បងក៏សោកា                  វាសនាទាមទារ            ឱ្យយើងព្រាត់គ្នា 

                                  មួយថ្ងៃពីរថ្ងៃ។

• ទៅរកចំណី                   ទីប្រភពថ្មី                   ប្អូនកុំសង្ស័យ

បងពុំបែកចិត្ត                 ក្បត់ផិតចោលថ្លៃ         មួយថ្ងៃពីរថ្ងៃ

                                   វិលវិញជួបស្រី។

• វិលវិញផ្ដោះផ្ដង           ជជែកសាសង               រាវរកសេចក្ដី

ទន់ភ្លន់ស្រាលស្រើប        សម្រើបមេត្រី                ប្អូនបងយល់ន័យ

                                  ស្រៀវស្រើបស្នេហា។

• ឱស្រស់ត្រាណត្រើយ      ទម្លាប់នេះហើយ          ស្អិតជាប់ចិន្ដា

 ជាប់ពេញទាំងខ្លួន          បំពួនកាយា                ស្រឡាញ់ជីវា

                                  បូកគុណលើសទ្វេ។

• ពេលឮសម្ដី                   កូនក្អាត់ហាស្ដី              បន្ទរបន្ទេរ

ពាក្យពេចន៍បីបម            ថ្នាក់ថ្នមបំពេរ               ដង្កូវមាសមេ

                                  ទន់ទោរចន្ដា។

• មុនក្អាត់ចេញទៅ            ដង្កូវនេះនៅ                 ឱ្យក្អាត់សន្យា                    

ថាមិនត្រូវផិត                 ទោះចិត្តកាយា              សូមរៀមសន្យា

                                  ថាមិនប្រែប្រួល។

• កូនក្អាត់យល់ស្រប          មាត់ហាឆ្លើយតប          ថាព្រមទទួល

តាមពាក្យសន្យា             ចិន្ដាមិនប្រួល              រំជើបរំជួល

                                  កែគេចរកស្រី។

• កន្លងច្រើនថ្ងៃ                 ដង្កូវថ្លើមថ្លៃ                នឹកដល់ម្ចាស់ស្នេហ៍

មិនទាន់ឃើញមក           ពន្លកម្ដេចដែរ              ឬរៀមប្រួលប្រែ

                                  ចិត្តកាយមែនហើយ។    

• ម្នាក់ឯងស្ងាត់ឈឹង          ចិត្តកួចជញ្ជឹង              ចង់ជួបត្រាណត្រើយ

ធ្លាប់ស្ដាប់សូរសៀង        សំនៀងរៀមឆ្លើយ         ពុំដែលតោះតើយ

                                  ឆ្លងឆ្លើយពីរោះ។

• នឹកដល់គ្រាដើម             ដែលយើងចាប់ផ្ដើម      ផ្ដោះផ្ដងសួរឈ្មោះ

ដ្បិតយើងគ្មានអ្វី             សូម្បីស័ក្ដិយស            ទ្រព្យធនខ្ពង់ខ្ពស់

                                  ក៏យើងគ្មានដែរ។

• នឹកគ្រាបងឆ្លើយ             សុំប្អូនកៀកកើយ          រួមស្និទ្ធរួមស្នេហ៍

ប្អូនឆ្លើយថា «ទេ..!»        មាសមេមកក្បែរ           បងឥតគេចកែ

                                  ស្ម័គ្រមើលថែថួន។        

• ភ្លាមនោះកូនក្អាត់            ចូលដល់ច្រាំងស្ងាត់      ក្រោមសម្បុកស្ងួន

ហើយស្រែកពញ្ញាក់         ស្រីភ្ញាក់ញ័រខ្លួន           ក្អាក់បង្ហាញខ្លួន

                                   ចំពោះមុខស្រី។

    (នៅមានត)