ចម្រៀង ព្រះគោព្រះកែវ កាព្យបថ្យាវត្ត

• ព្រះគោអស់ឫទ្ធិក្លាយខ្លួនជាថ្ម                   ព្រះកែវស្រស់ល្អកំដររៀមរា

ដេកយាមស្រុកសៀមក្រំក្រៀមចិន្ដា            ក្នុងគុកសីមាខ្លោចផ្សាឥតល្ហែ។

• ស្រងេះស្រងោចអាណោចកូនខ្មែរ              ហែកហួងហួរហែស៊ីតែគ្នាឯង

ភ្លេចហើយឬអ្វីគ្រាក្ដីចំបែង                        ប្រវត្តិសាស្រ្តចែងចែកបែងទឹកដី។ 

• ខ្មែរអើយ... អើយខ្មែរ... សឹងធ្លាក់អវិចី         រឿងចាស់អប្រិយ រឿងថ្មីសោកសៅ

បរទេសពង្វក់ ខ្មែរឈ្លក់ផ្សែងខ្មៅ                ខួរខ្មែរដំបៅព្យាបាលលែងជា។

• រឿងក្បត់ រឿងផិត រឿងចោទដាក់គ្នា            រឿងខ្មែរគ្រាំគ្រាវេទនាចិត្តកាយ

ព្រះគោព្រះកែវឃ្លាតចាកស្រុកឆ្ងាយ            គួរណាស់សប្បាយ លោកស្ដាយធ្វើអ្វី?

ដោយ ឌី ខាំញ៉ាញ់ ៥ ធ្នូ ២០១៨