ព្រះអង្គអើយ! ខ្ញុំព្រះករុណពុំធ្លាប់បានបួសរៀន ហើយក៏ពុំមានចំណេះដឹងអ្វីឱ្យជាដុំកំភួននោះឡើយនៅក្នុងព្រះពុទ្ធសាសនា។ ក៏ប៉ុន្តែខ្ញុំព្រះករុណាតែងតែងគោរពនូវឱវាទរបស់ព្រះអង្គ។ ហើយដោយសារតែជ្រួតជ្រាបនូវទស្សនៈអប់រំចិត្ត និងទ្រឹស្តីហេតុនិងផលដ៏មានតម្លៃនោះហើយ ទើបខ្ញុំព្រះករុណពុំដែលភ្លេចរំឭកដល់ព្រះអង្គឡើយ។ ពោលក្នុងមួយឆ្នាំទូលព្រះបង្គំអាចមានឱកាសបានទៅរំឭកដល់ព្រះអង្គបានពីរដង គឺនៅចំថ្ងៃកំណើត និងថ្ងៃព្រះអង្គទ្រង់បរិនិព្វាន។
ឥឡូវទូលបង្គំនិយាយខ្លឹមសារសំបុត្រដែលចង់ផ្ញើទៅព្រះអង្គតែម្តងទៅចុះ។ ព្រះអង្គធ្លាប់មានពុទ្ធដីកាមុននឹងចូលព្រះនិព្វានថា «ម្នាលភិក្ខុទាំងឡាយ គិតពីថ្ងៃនេះទៅ ខ្វះតែ៣ខែទៀតទេ តថាគតនឹងរំលត់ខន្ធចូលទៅកាន់ព្រះនិព្វានហើយ»។ សារដែលព្រះអង្គទ្រង់សម្តែងតាំងពី៣ខែ មុននឹងទ្រង់រលត់ខន្ធហាក់ដិតដាមនៅក្នុងចិត្តខ្ញុំព្រះករុណា ដ្បិតខ្ញុំព្រះករុណាស្ញើចសសើរលើប្រតិដ្ឋញាណ និងការប្រមើលពេលវេលាទៅមុខ ដែលព្រះអង្គទ្រង់ត្រាស់ដឹងប្រកបដោយសច្ចៈ។ ថ្ងៃនេះហើយជាថ្ងៃ១៥កើត ខែមាឃ ដែលព្រះអង្គទាយដឹងមុនថា ទ្រង់នឹងយាងចូលព្រះនិពន្វាន។ ព្រះពុទ្ធជាម្ចាស់នៃខ្ញុំ! មានមនុស្សមួយចំនួនធំនៅទ្វីបអឺរ៉ុប អាមេរិក អាស៊ី និងឥណ្ឌា ដែលខ្ញុំព្រះករុណាធ្លាប់ជួប ពួកគេស្ញើចនឹងទស្សនៈរបស់ទ្រង់រហូតដល់គេនាំគ្នាទិញរូបបដិមាតំណាងទ្រង់ដាក់តាំងនៅក្នុងផ្ទះពួកគេទុកជាសក្ការៈ ដើម្បីបង្ហាញសេចក្តីគោរពផង និងសេចក្តីពេញចិត្តដែលពួកគេមានចំពោះទ្រង់ផង។ ការណ៍នេះធ្វើឱ្យខ្ញុំព្រះករុណារំភើបចិត្ត ខណៈខ្ញុំព្រះករុណាបានត្រឹមតែរំឭកដល់ទ្រង់តែ២ដងទេក្នុងមួយឆ្នាំៗ។ តែជាអកុសលដែរ ព្រះអង្គអើយ ចាប់ពីឆ្នាំនេះ (ឆ្នាំ២០២០) តរៀងទៅ ខ្មែរយើងរួមទាំងខ្ញុំព្រះករុណាផង លែងមានពេលទៅចូលរួមពិធីបុណ្យរំឭកដល់ថ្ងៃចាប់កំណើត និងចូលបរិនិព្វានរបស់ទ្រង់តទៅទៀតហើយ។
ព្រះពុទ្ធជាម្ចាស់! ខ្ញុំព្រះករុណាដឹង ថាក្រៅពីពិធីរំឭកដល់ទ្រង់ទាំងពីរពេលក្នុងឆ្នាំនីមួយៗ ក៏នៅមានពេលច្រើនសន្ធឹកសន្ធាប់ផ្សេងទៀតដែរ ដែលយើងខ្ញុំជាជនជាតិខ្មែរ ធ្លាប់រើសយកព្រះពុទ្ធសាសនា ជាសាសនារបស់រដ្ឋនេះ អាចទៅគោរព និងរំឭកដល់ព្រះអង្គបាន។ ក៏ប៉ុន្តែក្នុងនាមពុទ្ធសាសនិកជន និងពលរដ្ឋដែលដឹងក្តីឡើង បានដឹងឮពីពិធីដ៏សំខាន់ និងមានន័យខ្លឹមសារនេះ ខ្ញុំព្រះករុណាពិតជាស្តាយ។ តែអ្ហើយព្រះអង្គអើយ ខ្ញុំពុំមានចេនានាំសារមិនល្អអ្វីថ្វាយព្រះអង្គជាម្ចាស់នោះទេ គឺគ្រាន់តែចង់ថ្វាយឱ្យទ្រង់ជ្រាបតែបុណ្ណឹងថា យើងលែងមានពេលជុំគ្នារំឭកដល់ទ្រង់ជាផ្លូវការទៀតហើយ៕
ដោយអារាមបាក់បែក
ថ្ងៃ១៤កើត ខែមាឃ ឆ្នាំកុរ ឯកស័ក ពុទ្ធសករាជ២៥៦៣
No comments:
Post a Comment