ខួង អភ័យវង្ស មានឪពុកម្ដាយជាប់សែស្រឡាយត្រកូលគ្រួសារស្ដេចត្រាញ់ខ្មែរ ចៅហ្វ៊ាបែន ដែលមានដូនតាជាអ្នកខេត្តកំពត ហើយក្រោយមក បន្ទាប់ពីចៅហ្វ៊ាបែន ចុះចូលជាមួយស្យាម បានប្ដូរមកប្រើ «ត្រកូលអភ័យវង្ស»។ ខួង អភ័យវង្ស កើតក្នុងថ្ងៃទី១៧ ខែឧសភា ឆ្នាំ១៩០២ នៅខេត្តបាត់ដំបង ជាកូនប្រុសរបស់ចៅហ្វ៊ា ឈុំ អភ័យវង្ស។ កូនប្រុសរបស់ចៅហ្វ៊ាឈុំម្នាក់នេះ បានក្លាយជានាយករដ្ឋមន្ត្រីថៃ ៣ជំនាន់ តែឯកសារខ្លះបញ្ជាក់ថា នាយកមន្ត្រីថៃមកពីគណបក្សប្រជាធិបតេយ្យរបស់ប្រទេសស្យាមរូបនេះ ធ្លាប់កាន់តំណែងជានាយករដ្ឋមន្ត្រីស្យាមដល់ទៅ៤ដង នៅក្នុងប្រវត្តិសាស្រ្តថៃ។
ខួង អភ័យវង្ស គឺជាមនុស្សម្នាក់ក្នុងចំណោមសមាជិកដទៃទៀតរបស់ក្រុមគណរាស្ត្រ បានធ្វើបដិវត្តន៍ផ្លាស់ប្ដូររបបរាជាធិបតេយ្យផ្ដាច់ការមកជារាជាធិបតេយ្យអាស្រ័យរដ្ឋធម្មនុញ្ញា នៅឆ្នាំ១៩៣២ និងធ្លាប់មានបណ្ដាស័ក្ដិជាហ្លួងកោវិទអភ័យវង្ស ព្រមទាំងជាអ្នកបង្កើតក្រសួងគមនាគម និងធ្លាប់កាន់តំណែងជាច្រើនក្នុងជួរមន្ត្រីរាជការ។
ពេលមានការបោះឆ្នោតជ្រើសរើសនាយករដ្ឋមន្ត្រីស្យាម ខួង អភ័យវង្ស ត្រូវបានបក្សម្ខាងចោទប្រកាន់ថា មានបុព្វបុរសមិនមែនជនជាតិស្យាមទេ គឺជាជនជាតិខ្មែរ។ ឆ្លើយតបចំពោះការចោទប្រកាន់នេះ ខួង អភ័យវង្ស នៅក្នុងអំឡុងឆ្នាំ១៩៦៣ បានអះអាងថា ខ្លួនមានពីកំណើតចេញត្រកូលនេះ ដោយឱ្យប្រជាពលរដ្ឋស្យាមពិចារណា និងកាត់សេចក្ដីដោយខ្លួនឯង ដោយសារខ្លួនមិនអាចសម្រេចបាន។
គួររម្លឹកថា ត្រកូលអភ័យវង្សបានចុះចូលជាមួយសៀម តាំងពីជំនាន់ចៅហ្វ៊ាបែន មកម្ល៉េះ ហើយត្រកូលនេះបានគ្រប់គ្រងខេត្តបាត់ដំបង អស់រយៈពេល៦ជំនាន់ គឺចាប់ពីឆ្នាំ១៧៩៥ ដល់ឆ្នាំ១៩០៧ ដោយចំណុះនគរសៀម ឬអាចនិយាយបានថា ជាខេត្តស្វ័យត្រួតត្រាដោយសែស្រឡាយត្រកូលចៅហ្វ៊ាបែន។ អ្នកប្រវត្តិសាស្រ្តមួយចំនួនបានហៅសម័យកាលនេះថា «សម័យលោកម្ចាស់» រហូតដល់ឆ្នាំ១៩០៧ ទើបព្រះបាទស៊ីសុវត្តិ តាមរយៈរាជបារាំងយកខេត្តនេះពីស្យាមមកឱ្យខ្មែរវិញ គឺនៅជំនាន់ចៅហ្វ៊ា ឈុំ អភ័យវង្ស ដែលឪពុកបង្កើតរបស់នាយ ខួង អភ័យវង្ស៕
No comments:
Post a Comment