ជាទូទៅ គេមើលឃើញមនុស្សមួយចំនួនកំពុងជំនក់ ឬញៀនហ្វេសប៊ុក ល្បែង គ្រឿងញៀន ចំណែកអ្នកនិយមការផឹកស៊ី ឬញៀនស្រាក៏មិនចាញ់គ្នាប៉ុន្មានដែរ។ «ស្រា» ក្លាយមកពីពាក្យ «សុរា» មានន័យថា ទឹកស្រវឹង ហើយទឹកស្រវឹងនេះ កំពុងពេញនិយមខ្លាំងបំផុតក្នុងស្រទាប់សង្គមខ្មែរនាពេលបច្ចុប្បន្ន។
នៅមិនទាន់មានឯកសារ ឬការស្រាវជ្រាវណាមួយជុំវិញបញ្ហាការញៀនស្រារបស់ជនជាតិខ្មែរឡើយ។ ពីមុនគេថា ខ្មែរអ្នកកាន់ព្រះពុទ្ធសាសនា៩៥% ប៉ុន្តែបើសង្កេតហ្មត់ចត់ជាងនេះទៅឃើញអ្នកផឹកស្រា៩៥% ទៅវិញ ឬចង់លើសពីនេះផង។ ការផឹកស្រាក្លាយជាទម្លាប់របស់ខ្មែរដែលពិបាកនឹងកែប្រែមែនហើយ។ ស្រាបានក្លាយជារបស់ដ៏សំខាន់ និងមិនអាចខ្វះបានស្ទើរនៅគ្រប់កម្មវិធី។
រាល់ពិធីជួបជុំស្ទើរតែទាំងស្រុងដែលខ្មែរធ្វើជួបជុំគ្នា គឺតែងយកស្រាជាគ្រឿងកំដរជានិច្ច។ បុណ្យទានផឹក ភ្ជាប់ពាក្យផឹក ការផឹក ខួបកំណើតផឹក ឡើងផ្ទះផឹក ឆេងម៉េងផឹក ចូលឆ្នាំសាកលផឹក ចូលឆ្នាំចិនយួនផឹក ចូលឆ្នាំខ្មែរផឹក ប្រឡងជាប់សប្បាយចិត្តផឹក ប្រឡងធ្លាក់ពិបាកចិត្តផឹក ទៅពិភាក្សាការងារផឹក ជោគជ័យការងារជប់លៀងផឹក សង្សារសុំបែកផឹក ប្រពន្ធកើតកូនផឹក សាច់ញាតិស្លាប់ផឹក និយាយទៅឱ្យតែមានរវល់ គឺផឹកលុះក្ស័យ។ ជាងនេះទៅទៀត ក្មេងៗជាច្រើន រួមទាំងសិស្សសាលាផង ក៏ហាក់ពេញនិយមនឹងគ្រឿងស្រវឹងនេះសម្បើមដែរ។
កម្មវិធីណាដែលអត់មានគ្រឿងស្រវឹងជាគ្រឿងកំដរត្រូវគេសើចចម្អកទៅវិញ។ បើមានមិត្តភក្តិណាម្នាក់ដើរលេងជុំគ្នា ហើយមិនចេះផឹក ឬមិនផឹកដោយយល់ពីការខាតប្រយោជន៍ ត្រូវមិត្តភក្តិសើចពេបជ្រាយទៅវិញ។ អ្នកនិយមស្រាអាយុ៥០មិនទាន់ទេ ស្ពាយជំងឺ៤ ទៅ៥មុខចូលពេទ្យ វេទនាទាំងវ័យក្មេង ហើយទៅបន្ទោសព្រហ្មលិខិត ឬបន្ទោសព្រះដាក់ទោសទណ្ឌដល់ខ្លួន។
សង្គមខ្មែរធ្លាក់ចុះដល់ដំណាក់កាលមួយ គឺលែងខ្មាសអ្នកណាទាំងអស់។ ជាតិសាសន៍មួយដែលចូលចិត្តទទួលទានស្រាអាចក្លាយជាជាតិសាសន៍ជាប់ចំណាត់ថ្នាក់ខ្ពស់ជាងគេលើសាកលលោក។ មិនមែនពួកគាត់មិនដឹងនោះទេ ថារៀងរាល់ឆ្នាំ មនុស្សខ្ទង់ពាន់នាក់បានស្លាប់ដោយគ្រោះថ្នាក់ចរាចរណ៍។ ក្នុងនោះ បើកបរក្នុងស្ថានភាពស្រវឹង នៅតែជាមូលហេតុចម្បងមួយ។ អំពើហិង្សាក្នុងគ្រួសារ រហូតដល់មនុស្សឃាត បន្ទាប់ពីសេពគ្រឿងស្រវឹង។ អ្វីដែលរឹតតែធ្ងន់ធ្ងរជាងនេះទៅទៀតនោះគឺសុខភាព។ អ្វីដែលសំខាន់មិនមែនតែអ្នកប្រព្រឹត្តិប៉ុណ្ណោះទេដែលរងគ្រោះដោយសារអ្នកស្រវឹង វាថែមទាំងបានផ្តល់ផលលំបាកជាច្រើនដល់អ្នកដទៃផង។ ដូច្នេះតើយើងត្រូវធ្វើយ៉ាងណាទើបអាចដោះស្រាយវិបត្តិនេះបាន? នេះគឺជាសំណួរចោទឡើងដើម្បីទទួលបានចម្លើយដ៏សមស្របពីអ្នកផឹក និងរាជរដ្ឋាភិបាល។
សូមជូនយោបល់ខ្លះៗជុំវិញការចាត់វិធានការ គឺត្រូវតែមានច្បាប់ដើម្បីគ្រប់គ្រងគ្រឿងស្រវឹង។ កំណត់អាយុអ្នកប្រើប្រាស់ ដំឡើងតម្លៃពន្ធស្រា ហាមឃាត់ការផ្សព្វផ្សាយគ្រប់រូបភាព កំណត់ទីតាំងលក់ ពិន័យឱ្យធ្ងន់ធ្ងរចំពោះអ្នកល្មើសជាដើម។ មិនពិបាកប៉ុន្មានទេ មើលស្រុកគេធ្វើម៉េចល្អ អាចទៅសិក្សា ឬកែច្នៃពីគេខ្លះបាន អ្វីដែលសំខាន់ គឺស្មារតី និងឆន្ទៈប្រាកដ៕
No comments:
Post a Comment